A montaxe 'Iribarne' arrasa nos Premios de Teatro María Casares

A montaxe 'Iribarne', de ButacaZero, foi a gran vencedora da XXIX edición dos Premios de Teatro María Casares. Conseguiu nove dos 12 galardóns aos que optaba.

Un total de 17 espectáculos aspiraban a facerse con algún dos 16 galardóns nos que se dividen os premios, organizados pola Asociación de Actores e Actrices de Galicia (AAAG) coa colaboración de institucións e entidades como a Xunta de Galicia a través da Axencia Galega das Industrias Culturais (Agadic), o Concello da Coruña, a Deputación da Coruña, as fundacións AISGE e SGAE e Gadis.

A produción de ButacaZero, Iribarne, foi a gran triunfadora ao levar nove dos 12 premios aos que aspiraba: espectáculo, dirección (Xavier Castiñeira), dirección de movemento (Sabela Domínguez), texto orixinal (Esther F. Carrodeguas), actor protagonista (Anxo Outumuro), actriz protagonista (Lida Veiga), espazo sonoro (Berto), vestiario (Diego Valeiras) e espazo escénico (Diego Valeiras e Xavier Castiñeiras).

Este último premio foi compartido con 'O dragón de ouro', espectáculo de Sarabela Teatro que levou catro premios: adaptación-tradución (Catuxa Pato), actriz secundaria (Sabela Gago), Iluminación (Laura Iturralde) e o xa citado.

'Os contos de Lobicán', obra de Redrum Teatro, fíxose co premio a mellor espectáculo de marionetas, mentres que 'Monstros', de Producións Teatrais Excéntricas, conseguiu o premio a mellor espectáculo infantil.

Por último, 'Apaga o candil', de Contraproducións', levou o galardón a mellor actor secundario, para Toni Salgado; e 'Pum! Pum! Quen hai?', de Ártika Cía, impúxose na categoría de maquillaxe, que premiou a Rocío Salgado e Fernanda Barrio.

Unha gala reivindicativa

A gala, conducida por Sarabela Teatro e baixo a dirección de Fernando Dacosta xunto a un elenco conformado por Sabela Gago, Fernando González, Belén Constenla, Josito Porto, Elena Seijo e Víctor Mosqueira, estivo infestada de referencias reivindicativas, sobre todo relacionadas co proxecto de Altri de Palas de Rei (Lugo) e coa situación do galego.

A vicepresidenta e o secretario da Asociación de Actores e Actrices de Galicia (AAAG), Eva Fórneas e Xosé Barato, encargáronse de pronunciar o discurso da xunta directiva, poñendo o foco na situación do galego, os medios públicos e a necesidade do asociacionismo para a defensa dos dereitos.

Arrincaron a intervención en castelán e de forma irónica, lembrando os "preocupantes" datos do uso do galego publicados polo Instituto Galego de Estatística o pasado mes de outubro e repasando os últimos 15 anos de políticas lingüísticas.

"A lingua é a nosa forma de ser e estar no mundo", defendeu Fórneas, que reivindicou o papel que xogaron os medios públicos na difusión do idioma a través da ficción e a dobraxe, "pedras angulares" para o galego.

Por último, Fórneas destacou no seu discurso que a AAAG celebra este 2025 o seu 40º aniversario. Ao fío disto, asegurou que "sen corpos asociativos fortes, o tecido sectorial rompe e que os dereitos gañados desde o colectivo non se poden dar por seguros". "O seu defensa necesita da nosa unión", animou.

Belén Regueira foi a encargada de ler o Manifesto Galego no Día Mundial do Teatro e, ademais, fíxose entrega do Premio de Honra Marisa Soto a Xabier Deive, que recolleron a súa filla, Irea Deive, e a súa muller, Eva Albaradejo.