Gaza recibe unha primeira axuda escasa mentres Israel intensifica a presión

O número de vítimas mortais polos ataques israelís en Gaza segue subindo por centos coa última actualización do Ministerio de Sanidade palestino.

Desde o 7 de outubro hai polo menos 4.469 persoas falecidas a consecuencia dos bombardeos e, segundo especifican, máis do 70 % son menores, mulleres e anciáns. Ademais, a cifra de feridos chega aos 14.000.

Mentres, Israel confirma que intensifica os plans e as manobras para a ofensiva terrestre e segue insistíndolle á cidadanía en que se desprace cara ao sur da Faixa.  

Precisamente ao sur foi a onde chegou a axuda humanitaria do primeiro convoi de vinte camións que entrou este sábado polo paso de Rafah despois de 14 días de bloqueo total. 

Axuda insuficiente

A ONU insiste en que se precisan uns 100 camións por día para satisfacer as necesidades na Faixa, que van a máis cada hora que pasa.

Nunha entrevista realizada despois da entrada do convoi, a Coordinadora Humanitaria da ONU explicaba que é preciso garantir unha entrada segura tamén de combustible.

"Trátase de facer chegar subministración básica: alimentos, auga, medicinas pero tamén combustible. O combustible é fundamental para cousas como o funcionamento dun hospital, plantas desalinizadoras e para a entrega da axuda. Os nosos camións non se poderán mover se non temos combustible. Entón, aínda que as Nacións Unidas sabemos que o combustible se considera un elemento de alto risco, debemos atopar a maneira segura de conseguilo", asegura Lynn Hastings, Coordinadora Humanitaria e Residente da ONU para o Territorio Palestino Ocupado.

Os Estados Unidos atribuíronse o éxito desta entrega de axuda grazas ao traballo diplomático con Israel e ao apoio de Exipto, e insistiron en que se debe manter aberto o paso fronteirizo.

Agardando ante o portón de sete metros de ancho hai máis de 500 camións e un operativo de axuda humanitaria que non deixa de preparar lotes de fornecemento médico e de recursos básicos.

A situación é límite para 1.400.000 persoas que tiveron xa que deixar as súas casas, e para aquelas que non puideron facelo por estaren feridas en hospitais ou non teren maneira de escapar. 

Edificios destruídos en Gaza polas bombas