A operación retorno do verán chega cos carburantes en mínimos anuais

O prezo dos carburantes en España encadeou esta semana unha nova baixada e marcou un novo mínimo anual, no caso do diésel, mentres que para a gasolina situouse en mínimos desde principios de febreiro, para a operación retorno das vacacións de verán, que arrinca este venres e prolongarase ata o vindeiro domingo.

No caso concreto do diésel, o prezo medio do litro situouse nos 1,437 euros, caendo un 1,1 % con respecto aos 1,453 euros da semana anterior, para encadear a súa sexta baixada seguida e marcar o seu nivel máis baixo desde principios de xullo de 2023, segundo datos do Boletín Petroleiro da Unión Europea.

No caso do prezo medio do litro de gasolina descendeu na última semana, na súa sétima caída consecutiva, un 1,13 %, para retroceder ata os 1,565 euros, o seu nivel máis baixo desde principios de febreiro.

Desta maneira, a gasolina acumula un descenso do 3,9 % e o diésel unha baixada do 4,2 % desde que iniciaron en xullo unha espiral de descensos, coincidindo cunhas datas marcadas polo período vacacional de verán e no que máis desprazamentos por estrada adoita haber en todo o ano.

O prezo medio de ambos os carburantes arrincou 2024 rexistrando as súas primeiras subidas en tres meses, despois de acumular un descenso tras outro desde finais de setembro de 2023, que o levou a despedir o ano pasado instalado en niveis mínimos do exercicio, sumando un abaratamento de case o 15 % no caso da gasolina e de máis do 13 % para o diésel.

Cos prezos actuais, encher un depósito medio de 55 litros de gasolina ten un custo duns 86 euros, uns 8,6 euros menos que nas mesmas datas do ano pasado, cando ascendía a uns 94,6 euros.

Para os vehículos de diésel, encher un depósito medio (55 litros) supón un desembolso actualmente duns 79 euros, ao redor de 9,6 euros menos que na mesma semana de agosto de 2023, momento no que o prezo era de 88,6 euros.

4,7 millóns de desprazamentos, máis de 700.000 en Galicia

A Dirección Xeral de Tráfico (DXT) prevé que se produzan 4,7 millóns de viaxes por estrada durante a operación retorno do verán -máis de 700.000 en Galicia-, desde as 15:00 horas deste venres ata a medianoite do próximo domingo, uns desprazamentos que confluirán cos de saída das vacacións de setembro.

A DXT espera que a volta se produza de maneira graduada entre este xoves e este venres e a fin de semana, aínda que os maiores movementos produciranse o domingo 1 de setembro, desde as zonas turísticas de costa e descanso cara aos grandes núcleos urbanos, informou Tráfico nunha nota.

Ademais, durante estes días tamén está prevista unha importante afluencia de vehículos nos principais eixos e pasos fronteirizos polo retorno de vehículos de matrícula estranxeira cara aos seus países de orixe.

As estradas galegas con máis afectación polo aumento do tráfico serán as seguintes: AP-9, A-6, A-8, A-52, A-55 e N-550.

Serán 46 persoas no centro de xestión de Galicia -que abarca todo o noroeste- as que estean despregadas durante a fin de semana, con 355 cámaras de televisión, 402 estacións de toma de datos, 102 sensores de variables atmosféricas, 487 paneis de mensaxe variable e 176 seccións de recoñecemento de matrícula.

Entre as 16:00 e as 22:00 horas do venres prevense importantes movementos que provocarán problemas de circulación, tanto en sentido saída dos grandes núcleos urbanos, como nos accesos ás zonas turísticas.

O sábado 31 continuará o tráfico intenso en sentido saída das grandes cidades desde primeiras horas da mañá, especialmente entre as 9:00 e as 13:00 horas, motivado polo comezo das vacacións de setembro e polos traxectos curtos habituais de fin de semana a zonas de segunda residencia e praias.

Pola tarde, xa haberá desprazamentos de retorno cara aos grandes núcleos urbanos que serán intensos nalgúns puntos.

O domingo 1 de setembro as maiores complicacións rexistraranse nos accesos a praias e costa e entre as 16:00 e as 23:00 horas comezará o retorno dos que finalizaron as súas vacacións en agosto e dos que gozaron da fin de semana, o que provocará tráfico moi intenso desde as zonas do litoral cara ás grandes cidades.

Para vixiar o tráfico nesta operación retorno, Tráfico conta tanto con medios humanos como técnicos, entre eles radares fixos e móbiles de control de velocidade, helicópteros-Pegasus, drons, cámaras, furgonetas e motos camufladas para controlar o uso de móbil e do cinto de seguridade e o respecto ás normas por parte dos motoristas.

Ademais, nas zonas máis conflitivas, instalaranse carrís reversibles e adicionais e estableceranse itinerarios alternativos. 

 Renfe sacou 20.000 prazas extras e os aeroportos teñen programados 21.000 voos

Renfe reforzou esta fin de semana os servizos de longo percorrido con 20.000 prazas extras e aínda así xa é difícil atopar billete nalgúns traxectos.
E os aeroportos son un bulir de xente. Durante a fin de semana hai programados máis de 20.000 voos.