Un tiroteo nas Vegas deixa tres mortos e un ferido en estado crítico

Un tiroteo na Universidade de Nevada, nas Vegas, deixou este mércores tres falecidos e un fediro grave, amais do falecemento do propio agresor, que foi abatido pola policía.

Adam García, encargado de Seguridade do centro universitario, confirmaba nunha breve comparecencia de prensa que o autor do tiroteo esaba "morto".

O alguacil da Policía metropolitana de Las Vegas, Kevin McMahill, limitouse a explicar que varias vítimas foran trasladadas a hospitais próximos. Máis tarde confirmábase o falecemento de tres delas.

Segundo o alguacil, xa non existe ningunha ameaza no campus universitario e aínda se descoñece a motivación que levou o agresor para perpetrar o tiroteo.

A policía das Vegas recibiu unha alerta de tiroteo na universidade ás 11:46 hora local (19:46 GMT).
Durante o tiroteo, os axentes pedíronlles aos cidadáns que evitasen a zona, mentres que a propia universidade avisou para que se puxesen a salvo. 

A Casa Branca limitouse a sinalar que segue o sucedido moi de preto.

Os tiroteos son "unha epidemia que o presidente (Joe Biden) se toma moi en serio. Por iso tomamos medidas. Estamos a vixiar a situación moi de preto", indicou na súa conferencia de prensa diaria a portavoz presidencial, Karine Jean-Pierre. 

Biden, emitiu un comunicado lamentando o tiroteo nas Vegas e outros dous ocorridos onte en Austin e en San Antonio (Texas), no que morreron seis persoas.

O líder demócrata reiterou o seu chamamento para que os republicanos no Congreso apoien a súa proposta de vetar o comercio de armas de asalto, que son utilizadas en moitos dos tiroteos.

Biden lembrou que Estados Unidos rexistrou durante este ano máis de 600 tiroteos masivos e uns 40.000 mortos pola violencia armada.

A Universidade de Nevada, abreviada como UNLV, é unha institución pública fundada en 1957 que conta con ao redor de 31.000 estudantes.