A princesa de Gales anuncia que ten cancro

A princesa de Gales, esposa do herdeiro á Coroa británica, anunciou este venres nun vídeo que se lle diagnosticou un cancro e que xa comezou un tratamento de "quimioterapia preventiva".

"En xaneiro, sometinme a unha importante cirurxía abdominal en Londres e nese momento críase que a miña enfermidade non era cancerosa.

A cirurxía foi exitosa. Con todo, as probas tras a operación acharon que houbera cancro.

Por tanto, o meu equipo médico recomendou que me sometese a un tratamento de quimioterapia preventiva e atópome agora nas súas fases iniciais", dixo Catarina.

O anuncio chega tras dous meses de elucubracións e rumores sobre o estado de saúde da princesa de Gales, de 42 anos.

"Estou ben e poñéndome máis forte cada día, centrándome nas cousas que me axudarán a curar, en mente, corpo e ánimo", dixo.

Catarina cualificou os dous últimos meses, desde a súa operación o 16 de xaneiro, de "incriblemente duros" e dixo que a noticia caeu como un "impacto enorme" sobre toda a súa familia.

"Custoume tempo recuperarme dunha cirurxía seria para comezar o meu tratamento. Pero, máis importante, custounos tempo explicarlle todo a Xurxo, Carlota e Luis (os seus fillos) dunha maneira que sexa apropiada para eles", agregou.

Tras destacar a "gran fonte de confort e tranquilidade" que lle supón ter ao príncipe Guillerme ao seu lado, a princesa de Gales pediu "tempo, espazo e privacidade" durante o tempo que dure o tratamento.

Vestida cun xersei de raias, co pelo solto e sentada nun banco ao aire libre, Catarina lembrou na súa mensaxe a todos aqueles afectados por cancro e pediulles que non perdan a esperanza.

O Palacio de Kensington -residencia oficial dos príncipes de Gales- sinalou que non van revelar máis detalles sobre a natureza do seu cancro nin sobre a duración do tratamento e reivindicou o "dereito á privacidade médica" de Catarina.

O rei de Inglaterra, orgulloso da súa nora

 O rei Carlos III de Inglaterra dixo este venres que está "moi orgulloso" da súa nora, a princesa de Gales, pola "súa valentía ao falar como o fixo" sobre o cancro que lle diagnosticaron.

O monarca, que tamén padece un cancro, permanece en estreito contacto coa súa "querida nora", sinala un portavoz do Palacio de Buckingham, residencia da familia real.

Despois da súa estancia xuntos no hospital tras ser operados en xaneiro, Carlos III mantivo o contacto coa súa nora nas últimas semanas e tanto el como a raíña Camila "continuarán ofrecendo o seu amor e apoio a toda a familia neste momento difícil", agrega.