O rei Carlos III de Inglaterra sofre un cancro

O rei británico Carlos III foi diagnosticado cun tipo de cancro que non foi especificado, informou este luns o Palacio de Buckingham.

Nun comunicado, a casa real británica explicou que o tumor lle foi descuberto no recente proceso cirúrxico para tratar un agrandamento de próstata a finais de xaneiro, aínda que a corporación pública BBC detallou que non se trata de cancro de próstata.

O rei, de 75 anos, comezou este mesmo luns un "calendario de tratamentos regulares", durante os cales suspenderá as súas actividades públicas, segundo Buckingham.

"Durante o recente proceso hospitalario do rei para un agrandamento de próstata benigno, descubriuse un asunto de preocupación diferente. As probas diagnósticas subseguintes identificaron unha forma de cancro", sinala a nota.

Segundo Buckingham, a pesar de cancelar as súas próximas actividades públicas, Carlos III seguirá desenvolvendo o seu traballo de despacho con normalidade.

"A Súa Maxestade elixiu compartir o seu diagnóstico para evitar as especulacións e coa esperanza de que poida axudar á comprensión cidadá cara a todos aqueles no mundo que están afectados polo cancro", di o comunicado.

Carlos III séntese "moi positivo" sobre o seu tratamento oncolóxico e pretende "regresar á plena actividade pública tan pronto como sexa posible".

O rei expresou ademais o seu agradecemento ao equipo médico que o atendeu pola súa "rápida intervención", que fixo posible o seu recente proceso cirúrxico.

O pasado 26 de xaneiro, o monarca ingresou no hospital London Clinic, no centro da capital británica, para someterse á intervención contra o agrandamento de próstata, como fora anunciado nove días antes.

A statement from Buckingham Palace: https://t.co/zmYuaWBKw6

📷 Samir Hussein pic.twitter.com/xypBLHHQJb

— The Royal Family (@RoyalFamily) February 5, 2024