A poboación vulnerable terá que manter as medidas de protección despois da pandemia

Esta semana demos un paso máis na convivencia co virus da covid coa retirada das máscaras nos transportes. Os científicos insisten en que é necesario volver á normalidade porque non hai xa emerxencia sanitaria e o virus seguirá convivindo con nós. Poñen o foco da protección nas persoas vulnerables.

Despois de observar o comportamento da covid este outono e parte do inverno, os inmunólos consideran que chegou a hora de normalizar definitivamente a nosa relación co virus como un máis dos que aparecen nesta época, e ao que lle terá que prestar especial atención só a poboación vulnerable. Así o valorou José Gómez Rial, inmunólogo do complexo hospitalario universitario de Santiago.

É un virus circulante máis. É un virus respiratorio que non vai desaparecer porque ademais ten un reservorio animal co cal vai andar saltando entre humanos e animais. Podemos dicir que a pandemia rematou pero o virus non rematou porque vai seguir con nós no resto do tempo. 

Por iso o inmunólogo José Gómez avoga por restrinxir o uso da máscara só a certos espazos dos centros sanitarios e que realmente a poboación faga un uso responsable dela cando deba protexerse ou evitar contaxiar a outros.

Recomendar o uso da máscara a determinadas persoas en determinados momentos. E sobre todo, saber usar ben a máscara por determinadas persoas que son quen realmente a necesita. O único que facemos obrigando a todo o mundo a poñer a máscara é que, cando se levanten as medidas de obrigatoriedade, a xente non queira saber nada máis da máscara e non a queira usar.

Insiste en que en España non hai emerxencia sanitaria, que a taxa de poboación vacinada é moi alta, sobre todo en Galicia, e que esta cuarta dose, para persoas que xa están protexidas coas tres anteriores, e que ademais pasaron a infección da variante ómicron, non é necesaria.