A rebelión do grupo Wagner en Rusia pon contra as cordas a Putin
A rebelión do grupo Wagner en Rusia pon contra as cordas a Putin
Prigozhin frea a marcha sobre Moscova e exíliase en Belarús
O Kremlin anuncia que retirará os cargos contra o xefe de Wagner e os seus homes
Rusia viviu unha situación inédita en décadas este sábado cunha rebelión militar, a cargo do xefe dos mercenarios de Wagner Ievgueni Prigozhin, que se transformou nun intento de golpe militar que durou tan só unha xornada.
Tras tomar Rostov do Don e os seus edificios oficiais, un enclave estratéxico e loxístico na guerra de Ucraína e de avanzar con blindados cara a Moscova aparentemente sen oposición, motivado polo seu enfrontamento co Ministro de Defensa ruso, o xefe dos mercenarios anunciou o sábado pola tarde que freaba a marcha e que repregaba os seus homes aos seus campamentos para "evitar un baño de sangue".
O Kremlin tamén anunciaba pouco despois que retiraba os cargos contra Prigozhin e os homes que integraban as columnas que ocuparon Rostov e chegaron ata case 300 quilómetros de Moscova. E que o líder de Wagner poderá refuxiarse en Belarús.
O motín contra o exército deixa a Vladímir Putin e o seu réxime debilitados no medio da operación militar en Ucraína e da contraofensibva no leste das tropas de Kíiv.
Mediación de Belarús
A intelixencia occidental apunta que as negociacións na xornada do sábado foron frenéticas e máis despois de que Prigozhin non fixese caso das ameazas de represalias "brutais" do presidente ruso para que cesase.
O presidente belaruso, Aleksandr Lukashenko, atribuíuse a mediación e asegurou nun comunicado que se chegou a un acordo “absolutamente rendible e aceptable” para Wagner e que se lle deron “garantías de seguridade” sen especificar.
O movemento de Prigozhin era arriscado en extremo: o empresario non conta co apoio das elites.
Prigozhin e os seus mercenarios non encontraron moita oposición no seu avance ata o anuncio de que paraban a marcha. O motín supuxo a ameaza máis grave para o Kremlin en tres décadas, desde a guerra de Chechenia. A falta de medios, de material e de preparación e as derrotas de Rusia en Ucraína poden avivar conflitos internos.
A reacción mundial ao que pasaba en Rusia, un país cun dos maiores arsenais de armas nucleares a nivel global, non pasou de diferentes contactos entre as potencias. Falaron "dun problema interno" para evitar que Putin utilizase a súa retórica habitual contra Occidente.
Moscova mantense nun alto nivel de alerta por "operacións antiterroristas" que prevé restricións de movementos. O alcalde da cidade declarou antes da retirada de Wagner que o luns non sería laborable, excepto para as forzas de seguridade e os servizos urbanos e instou os cidadáns a evitar saír á rúa.
Kíiv interpreta a situación en Rusia como unha ventá de oportunidade para a súa contraofensiva para recuperar territorio, ante a que cre inestabilidade no país invasor, que mantén 400.000 soldados rusos despregados en Ucraína.,
![os mercenaris de Wagner abandonan Rostov do Don entre aclamacións da poboación local](https://img-g24-crtvg.flumotion.com/prog24/2023/20230625/astropasdeWagnersaendeRostov.png)