A Reserva Federal estadounidense sobe os tipos de xuros 0,75 puntos, quinto aumento en seis meses

A Reserva Federal de Estados Unidos (Fed) anunciou este mércores unha subida do tipo de xuros oficial de 0,75 puntos porcentuais, o quinto aumento desde marzo e o terceiro consecutivo de tres cuartos de punto, nun novo intento de controlar a inflación.

O Banco Central estadounidense cumpriu as expectativas dos economistas e a taxa de xuro oficial da maior economía do mundo pasa situarse nunha pinza de entre o 3 e o 3,25 %, o nivel máis alto nos últimos 14 anos.

Tras unha reunión de dous días, os membros do Comité Federal de Mercado Aberto da Fed tomaron esta decisión, que será xustificada nos próximos minutos polo presidente da Reserva, Jerome Powell, nunha conferencia de prensa.

Powell xa adiantara o pasado mes de xullo, cando anunciou a anterior subida, que en setembro posiblemente se produciría outro "aumento inusualmente grande" dos tipos, un vaticinio que foi reafirmando nos seus últimos discursos públicos.

En diversos actos públicos nas últimas semanas, insistiu na necesidade de que a Fed continúe cunha política monetaria restritiva para baixar os prezos e evitar que os cidadáns acaben afacéndose á alta inflación, que en agosto se situou no 8,3 %.

"Debemos actuar agora con franqueza, con forza, como o estivemos facendo, e debemos seguir facéndoo ata que o traballo estea terminado", apuntou nunha charla recente.

Uns datos que mostran que, polo momento, a serie de subida de tipos que a Fed leva implementando desde marzo aínda non está a ter o desexado impacto nos prezos.