A terceira edición do Torneo do Ano volverá a recadar fondos para a Asociación Contra o Cancro
Terá lugar no campo municipal Manolo Barreiro de Pontevedra o mércores 16 de abril
Os organizadores esperan superar os mil euros recadados en cada unha das edicións anteriores
Uns rapaces de Pontevedra están detrás do Torneo do Ano, unha cita máis solidaria que competitiva. Será o 16 de abril, véspera de Xoves Santo, no campo de fútbol municipal Manolo Barreiro.
"Creo que o que nos move a todos é a loita contra unha enfermidade como é o cancro e axudar a toda a xente que está pasando por ela para poder afrontala e continuar", di Gabriel Fontenla.
Están inscritos 16 equipos. Os promotores agardan que os futbolistas e os creadores de contido que xa lles confirmaron a súa participación contribúan a que esta terceira edición sexa multitudinaria.
"No día do evento esperamos unha recadación grande coa venda de camisetas, chaveiros e pulseiras. Que a xente colabore difundindo toda a causa. Coas doazóns dos xogadores vaise recadar 500 €, máis o que se recade vía Bizum ou presencialmente no Manolo Barreiro", di Javi Domínguez, promotor e organizador do evento.
Contan con superar os mil euros recollidos en cada unha das edicións anteriores.
