A torre polivalente do CHUAC entrará en funcionamento a finais de 2025
A torre polivalente do CHUAC entrará en funcionamento a finais de 2025
Terá 16 plantas e 13.000 metros cadrados con dous accesos e unha pasarela que conectará o edificio co bloque central do hospital actual
A Xunta, que prevé abrir o día 12 o aparcadoiro para o persoal sanitario, destina 500 millóns ás infraestruturas do complexo sanitario coruñés
Sanidade di que o CHUAC incrementará un 15 % o número de camas e máis dun 50 % os postos de observación e consultas en Urxencias
A torre polivalente do hospital da Coruña (CHUAC), desde onde se administrará todo o complexo e terá dúas plantas para o hotel de pacientes, entrará en funcionamento a finais de 2025.
Así o anunciaron este xoves nunha visita ás obras a conselleira de Vivenda e Planificación de Infraestruturas, María Martínez Allegue, e o conselleiro de Sanidade, Antonio Gómez Caamaño, quen detallou que o prazo de execución é de "18 meses".
La Torre Polivalente, segundo detallou o arquitecto e director de obra, Manuel Vázquez, terá "16 plantas e 13.000 metros cadrados" con "dous accesos" e unha "pasarela" que conectará o edificio co bloque central do hospital actual.
O inmoble estará dedicado a "xestión e administración", aínda que tamén terá "dúas plantas para hotel de pacientes con 14 habitacións", engadiu Vázquez.
A conselleira de Planificación de Infraestruturas avanzou que a Torre Polivalente terá "unha zona verde", que considera "moi necesaria" neste tipo de complexos.
Martínez Allegue anunciou tamén que o aparcamento provisional para persoal sanitario "abrirá o vindeiro venres", día 12 de xullo, pois está pendente aínda a colocación da "barra de seguridade" e o "asfaltado do acceso".
Lembrou que "os inicios" para levar a cabo a ampliación do CHUAC "foron complicados, pero finalmente deu o seu froito".
Desvelou que a Xunta está "a ultimar a redacción da vía perimetral de accesos", que espera que se poida presentar "a final de ano".
Tamén indicou que espera que se licite a redacción dos proxectos da segunda e terceira fase "no primeiro semestre de 2025".
Martínez Allegue resumiu que o Goberno autonómico vai investir "500 millóns de euros" neste proxecto.
Para Antonio Gómez Caamaño, o novo CHUAC é "a infraestrutura máis potente impulsada pola Xunta" que "non só ampliará a extensión" do complexo senón que tamén incrementará "un 15 % o número de camas" e "máis dun 50 % os postos de observación e consultas en Urxencias".
O obxectivo, dixo, é "coidar os pacientes e o persoal sanitario" a través deste "centro de referencia".
