A UE pacta un tope de 60 dólares ao barril de petróleo ruso

Os países da Unión Europea chegaron este venres a un acordo para fixar un tope ao prezo do petróleo ruso de 60 dólares por barril.

A medida forma parte das represalias contra Moscova acordadas xunto ao G7 pola guerra contra Ucraína.

O tope, con todo, non afecta directamente o bloque comunitario, porque a partir do próximo luns aplicará un embargo total ao cru que importa de Rusia, salvo o que compra Hungría por oleoduto.

Agora ben, prohibirá ás navieiras europeas transportar o petróleo ruso a terceiros países se se vende a un prezo superior ao fixado.

O acordo político de hoxe garante que, se o prezo de mercado baixa de 60 dólares o barril, o tope actualizarase de tal forma que polo menos estea un 5 % por baixo do que teña no mercado.

Polonia levantou así o veto que mantivo no últimos dez días, xa que pretendía que o tope pactado entre os Vinte e sete fose bastante inferior aos 65 dólares que acordou o G7.

En cambio, Grecia, Malta e Chipre pretendían que o prezo fose superior, para non danar o negocio das súas navieiras, que transportan gran parte do cru que Moscova envía fóra das súas fronteiras.

Ademais, o tope ao petróleo ruso supón prohibir o seguro e reaseguro, así como outros servizos financeiros, sobre todos aqueles barcos que carguen cru adquirido a un prezo superior ao do tope, o que na práctica dificultaría as propias compras ou o seu posterior transporte.

A cambio de desbloquear o acordo, Polonia logrou o compromiso dos seus socios europeos para acelerar o noveno paquete de sancións contra Moscova.