O petróleo sobe un 6% tras o anuncio do recorte da produción

A decisión anunciouse o domingo e confirmárona este luns os 27 países que forman a Organización de Produtores de Petróleo e os seus aliados, entre eles Rusia.

Arabia Saudita vai deixar de extraer medio millón de barrís diarios, Iraq recortará a súa produción en 200.000 e os Emiratos Árabes Unidos farán o mesmo con outros 145.000. En conxunto, os produtores retiran do mercado máis dun millón de barrís.

Ademais, Rusia prorroga ata finais de ano a redución de medio millón de barril que comezou a aplicar en decembro.

Con esta manobra, a OPEP tenta revitalizar uns prezos que se dispararan tras a guerra de Ucraína pero que nas últimas semanas estaban mesmo por baixo dos niveis anteriores á invasión.

A redución non se vai executar ata maio, pero nos mercados os efectos xa se están notando: o prezo do barril de Brent, referencia en Europa, subiu este luns ata preto dos 85 dólares, case un 6% máis que o venres. E o mesmo pasou co petróleo Texas, polo que se guían nos Estados Unidos.

A decisión ameaza non só con subir os prezos dos combustibles, senón do resto de produtos da cesta da compra, xusto cando a inflación comezaba a dar sinais de moderación.