A Unidade Militar de Emerxencias fai prácticas contra o lume nos montes galegos
A Unidade Militar de Emerxencias fai prácticas contra o lume nos montes galegos
Efectivos da UME colaboran coas brigadas de Medio Rural nunha queima prescrita en Vimianzo
As brigadas forestais da Xunta preparan os montes para reducir os riscos de incendio no verán. Fan rozas ou queimas para eliminar combustible dos montes, e nun destes operativos sumóuselles a Unidade Militar de Emerxencias.
Executaron en Vimianzo unha das últimas queimas prescritas da campaña, que se desenvolve entre finais do outono e principios da primavera. Fanse nos 19 distritos forestais galegos para que os montes estean mellor protexidos do lume.
As queimas dirixidas permiten controlar a vexetación en superficies de difícil acceso, e crear unha franxa de seguridade libre de mato.
"Se houbera lumes, contrólanse mellor e non se farían tan extensos", explica un dos axentes ambientais do Distrito Forestal de Fisterra.
A UME desprazou ata Vimianzo 37 militares e 15 vehículos do Quinto Batallón de Intervención en Emerxencias, con base en León. Traballaron na planificación e na execución da queima prescrita, desenvolvida nunha superficie de cinco hectáreas.
Segundo explicou o xefe do Servizo provincial de Prevención de Incendios Forestais, Guillermo Acebal, foi a UME a que solicitou esta colaboración, co obxectivo de facer prácticas no terreo.
"Están interesados por seguir en contacto co manexo do lume, nesta época de baixo risco. Están facendo o traballo máis parecido ao que farían nunha extinción", conta Acebal.
