A Universidade premia a Xose Manuel Beiras pola súa defensa do galego

O histórico dirixente nacionalista Xosé Manuel Beiras recibiu este mércores o premio Luís Porteiro Garea polo "seu labor activo a favor da lingua galega" como profesor e, posteriormente, como catedrático e decano, e confesouse un “privilexiado” ao poder usar o galego en todas as facetas da súa vida.

Na entrega do galardón en Santiago de Compostela, no paraninfo da Facultade de Xeografía e Historia, Beiras admitiu que el viviu “nunha especie de oasis no medio da barbarie” porque na súa infancia foi criado en galego, feito que fixo que o seu compromiso co idioma fose, desde as súas orixes, algo “natural”, froito da súa orixe familiar.

Tamén coa súa primeira muller e os seus fillos, relatou, falou sempre en galego, polo que a utilización desta lingua na universidade e na política "non foi un esforzo especial, senón congruente”, con todas as súas vivencias.

De feito, o dirixente nacionalista lembrou que el xa puido ler 'Sempre en Galiza' de Castelao con 13 anos.

Tras repasar o seu vínculo co idioma a través da súa traxectoria persoal, universitaria e política, Beiras alertou sobre a situación actual, xa que despois de catro décadas do Estatuto de Autonomía a defensa organizada do idioma depende fundamentalmente da sociedade civil e de organizacións como a Mesa pola Normalización Lingüística.

De feito, criticou que o galego estea a ser relegado ao rol de terceiro idioma do país, por detrás do inglés, xa que entende que isto é prexudicial para a comunidade galega porque “así non se constrúen sociedades democráticas, nin se consegue que os cidadáns non sexan súbditos”.

Por todo iso, Beiras agradeceu o galardón impulsado polo seu “discípulo” e exdirixente do BNG, Xavier Vence, que tamén traballou a favor do idioma galego na universidade.

“Este premio é unha gran sorpresa, pero estou moi agradecido; xa de vello agradécense estas mostras de recoñecemento por algo que eu fixen por convicción propia desde moi novo”, sinalou o premiado.