A Xunta ábrese a flexibilizar a compatibilidade e a reformar a atención primaria

A Xunta abriuse este martes a reestruturar o sistema de Atención Primaria, flexibilizar a compatibilidade dos profesionais sanitarios da sanidade pública con outra actividade privada e a abordar nun futuro que todos os médicos galegos poidan percibir o complemento específico aboado pola entidade pública Sergas por exclusividade, de máis de 800 euros.

Todo iso tratouse nunha xuntanza que á última hora desta tarde mantiveron o presidente da Xunta Alfonso Rueda e o conselleiro de Sanidade Julio García Comesaña cos representantes do Colexio Oficial de Médicos e que se estendeu durante máis de tres horas.

“Comprometémonos a estudalas”, sinalou o conselleiro sobre as propostas do Colexio de Médicos.

O principal avance e punto de encontro tivo lugar respecto á flexibilización da compatibilidade do exercicio profesional na sanidade pública e na privada en tanto que a Xunta pretende presentar un estudo respecto diso antes de que conclúa o ano.

“Está encima da mesa unha interpretación máis flexible” que implique “modificacións nos contratos”, admitiu Comesaña, que cre que, neste aspecto, se deron “pasos importantes”.

Respecto á reestruturación dos centros de saúde nun contexto de escaseza de facultativos e moitas prazas sen cubrir, o titular de Sanidade tamén explicou: “O Colexio puxo encima da mesa propostas que, por suposto, serán analizadas e discutidas con eles noutras reunións”.

Pola súa banda, o presidente do Consello Galego de Colexios Médicos Isidro Lago, tamén titular do de Pontevedra, confiou en que os avances dados hoxe “dean os seus froitos” antes de fin de ano.

Con todo, aínda non se tratou en profundidade a cuestión relativa ao agravio nas condicións laborais que, segundo os profesionais, se dá en Galicia en cuestións como o complemento específico, xa que só na comunidade autónoma galega e en Asturias os médicos que compatibilizan a actividade na pública e na privada perden o complemento específico completo, lembrou.

Esta cuestión, admitiu o profesional, require dun “soporte económico que supón un apartado en orzamentos”, xa que implicaría unha subida salarial para os médicos, polo que se ten que tratar a medio prazo.

Sobre a mesa tamén estaba a delimitación de competencias de cada profesional sanitario nunha xornada en que precisamente o Tribunal Superior de Xustiza de Galicia (TSXG) anulou unha instrución do Sergas que permitía aos farmacéuticos de atención primaria renovar as receitas de tratamentos crónicos para pacientes.

O Alto Tribunal estimou o recurso interposto polo Consello de Colexios Médicos de Galicia contra a resolución de outubro de 2021 do Sergas, polo que Lago considerou que “a lei é clara”, pois eles reclaman que se respecten as competencias que incumben a cada profesión.

O conselleiro mostrou “máximo respecto” ante a sentenza xudicial e lembrou que esta foi unha medida que se puxo en marcha nun contexto de pandemia sanitaria marcado por falta de especialistas.