A Xunta amplía o servizo de autobuses entre Vigo e o aeroporto de Santiago
A Xunta amplía o servizo de autobuses entre Vigo e o aeroporto de Santiago
Habilítase unha liña máis por semana e outra os domingos con saída desde a estación intermodal de Vigo
Os usuarios afectados polo peche temporal da terminal de Peinador contarán con máis facilidades para coller os voos
Desde o peche de Peinador, a posta en marcha do servizo de autobuses entre Vigo e o aeroporto Rosalía de Castro está a facilitar a mobilidade aos viaxeiros.
A Xunta de Galicia amplía o servizo desde este luns incorporando unha liña máis durante a semana e outra os domingos e festivos. Din os usuarios que é a mellor alternativa mentres duren as obras da pista de aterraxe que manteñen pechado o aeroporto vigués.
As novas frecuencias incorpóranse de luns a venres ás sete da tarde e os domingos e festivos ás sete e media. Ademais tamén se amplía outra liña en sentido inverso, de Santiago a Vigo. Neste caso sairá ás dez e cinco da noite de luns a venres e ás dez os sábados e domingos.
O aeroporto de Peinador permanece pechado desde o pasado oito de maio por obras na pista de aterraxe. Os traballos avanzan a bo ritmo, segundo Aena, que mantén a data de apertura para o próximo 31 de maio.
