A Xunta e as universidades apostan por un modelo educativo dual

Galicia quere facer unha forte aposta pola formación universitaria dual cun sistema pioneiro en España. Trátase de combinar as clases de graos e másteres na facultade co traballo remunerado e cun contrato en empresas.

O Goberno galego quere reproducir a experiencia da FP dual. En definitiva, o obxectivo é recortar a distancia entre o mundo laboral e o académico, e que todos os sectores produtivos colaboren man a man coas universidades.

"Incrementar a interacción que existe e mais a confianza entre os sectores produtivos e a universidade e deseñar sinerxías entre a academia e os sectores produtivos buscando sempre un beneficio mutuo", di Román Rodríguez, conselleiro de Educación.

Deste xeito, o Sistema Universitario de Galicia contará a partir do próximo curso cun modelo de graos e másteres en que o alumnado combinará a súa formación nas tres universidades públicas cun contrato laboral regulado e remunerado nunha empresa.  

O titular da Educación destacou que esta iniciativa que "reproducir o éxito que a opción dual tivo na Formación Profesional tamén nas universidades". Sobre isto, Román Rodríguez lembrou que o alumnado da FP Dual alcanza unha taxa de empregabilidade de case o 100 %, "o que demostra que se trata dun modelo educativo de éxito para a captación de talento e para a formación de calidade de profesionais cualificados e necesarios para o tecido económico".   

A lei de universidades unha oportunidade perdida

A Xunta ve unha oportunidade perdida na nova lei de universidades que onte aprobou o Congreso. O goberno galego cre que responde a intereses partidistas, e que deixa desprotexidas ás comunidades porque fixa un mínimo de financiamento por lei, pero non o dota economicamente.

"É unha lei que volve ser unha oportunidade perdida. Non soluciona algúns dos problemas e vai xerar novas dinámicas que, entendemos, non serán positivas para a universidade", afirma Román Rodríguez, conselleiro de Educación.