Aproban 421 prazas para postos de difícil cobertura do Sergas por concurso de méritos

O Consello da Xunta aprobou este xoves unha oferta de emprego público de 421 prazas para postos de difícil cobertura no Sergas. A convocatoria será por concurso de méritos, sen oposición, para paliar a falta de médicos nalgunhas especialidades e zonas.

Das 421 prazas que convocará o Sergas 116 serán para médicos de distintas especialidades en hospitais comarcais, 72 para médicos de familia en centros de saúde, 60 para pediatras de primaria e 173 para profesionais de saúde mental.

O presidente da Xunta, Alfonso Rueda, destaca que Galicia é "pioneira" neste sistema para paliar a falta de médicos e lembrou outras medidas nesta liña como as "melloras nas retribucións ou a oferta dun contrato estable de tres anos aos mir de familia".

O Consello da Xunta tamén aprobou este xoves a expropiación dos terreos onde se construirá unha das primeiras obras visibles do novo hospital da Coruña: a Torre Polivalente, que ten un orzamento de 37 millóns. Prevén licitala no segundo trimestre deste ano.