A Xunta pon en marcha unha campaña para evitar accidentes laborais nos traballos en altura

Reparación de cubertas, colocación de antenas ou de paneis solares son traballos que poden resultar moi perigosos. De feito, se temos en conta só os accidentes graves e mortais por caídas desde altura, prodúcese un cada sete días en España.

Co lema "O importante é baixar con vida", a campaña que pon en marcha o Instituto de Seguridade e Saúde Laboral de Galicia pretende reducir estas cifras, que consideran inaceptables a día de hoxe. Subliñan que os sinistros graves prodúcense ás veces en traballos curtos e sinxelos, e que a revisión dunha antena, a colocación dunha tella ou a simple observación dun dano pode custarnos a vida ou unha paraplexía. 

 "Unha de cada catro mortes que se producen en España en accidente laboral en xornada de traballo ten que ver coa caída desde unha cuberta, e do que se trata é de reducir ese número que nos parece inaceptable", di Ángel López, o xefe do centro do ISSGA en Ourense

Para iso en moitas empresas e comunidades de veciños van recibir estes carteis e dípticos informativos, para axudarnos a valorar as ofertas que non aforran na seguridade dos traballadores.

"Dentro das ofertas, o que contrata debe escoller aquela que lle garante que a persoa que vai subir á cuberta o fará con seguridade. O recomendable é instalar protección colectivas pasarelas, varandas e redes de protección. É moi importante tamén é que os traballadores suban ancorados a unha liña de vida", advirte Ángel López, o xefe do centro do ISSGA en Ourense. 

Unha obra que se fai para a primeira suba ao tellado, e que pode encarecer inicialmente o custo pero que se rendibiliza nas seguintes ocasións. Tamén advirten sobre as pequenas chapuzas domésticas, que poden entrañar un risco mortal.