Santiago poderá cobrar a taxa turística o ano que vén

O director da Axencia de Turismo de Galicia, Xosé Merelles, informou de que a Xunta prevé que "estea lista o 1 de xaneiro" a normativa autonómica para que os concellos que así o desexen apliquen unha taxa turística.

Diso informou tras reunirse coa alcaldesa de Santiago, Goretti Sanmartín, quen mostrou a súa satisfacción, dixo, "polo cambio de opinión" da Xunta e urxiulle a que "poña o turbo" e "acelere todos os procesos", de modo que "faga a parte que lle corresponde".

Neste escenario, a proposta lexislativa irá agora ao Parlamento "para que canto antes se poida aplicar este imposto", segundo destacou Merelles, antes de referirse a que haberá "debate" no Hórreo e "probablemente se enriqueza" coas achegas dos grupos parlamentarios.

Como requisito, a recadación do imposto será "100% municipal", incidiu. É dicir, será un tributo autonómico cuxa xestión recaerá nos consistorios.

Xuntanza entre Turismo da Xunta e o Concello de Santiago

"A Xunta non se vai a opoñer a que exista un imposto turístico en Santiago", proclamou o director de Turismo ao comezo da súa intervención perante os medios de comunicación, aos que chanceou sobre a expectación.

As comparecencias producíronse por separado e, en primeiro lugar, Merelles falou dunha reunión "especialmente cordial e moi construtiva", así como da existencia de "moita colaboración institucional".

Pola súa banda, a rexedora compostelá valorou o "salto de xigante" que se dá con este anuncio, nunha "mudanza" do parecer do Executivo galego que cualifica de "tremendamente satisfactoria" para o goberno santiagués.

Máis concellos poderán solicitar unha taxa turística

A norma que a Xunta quere que entre en vigor o próximo 1 de xaneiro, segundo constatou este venres o responsable da Axencia de Turismo, "abre a posibilidade de que outros concellos soliciten unha taxa turística".

Iso si, "sempre con esas condicións" que previamente enumerara: "xestión íntegra por parte do concello que solicite e que se teña en conta que a utilización destes recursos van ser para conseguir un turismo máis sostible e recuperar as externalidades que produza a actividade turística".

Respecto diso, afirmou coñecer o interese por parte dalgún municipio, pero só pola prensa, xa que ningún se dirixiu "oficialmente" á Xunta, máis aló de Santiago.

Participación do sector e da cidadanía

"Desde o primeiro momento" que chegou ao goberno, Goretti Sanmartín, segundo lembrou, leva "poñendo enriba da mesa este tema". Por iso falou dunha "moi boa noticia".

Pola súa banda, sinalou que "a pelota agora está no tellado da Xunta", pero apelou á "boa vontade" en relación ao "texto definitivo" que aprobe a Cámara autonómica, dada a composición do arco parlamentario -con maioría do Partido Popular-.

"Oxalá que se cumpra ese prazo" e que "o 1 de xaneiro estea listo", opinou sobre os prazos, para, a continuación, explicar que despois, "evidentemente" haberá que sacar adiante unha ordenanza municipal "para facer a cobranza".

Neste e noutros aspectos, como outra ordenanza para implantar unha taxa a excursionistas -esta si, municipal-, xa traballa o goberno municipal de Santiago, segundo apuntaron tanto Sanmartín como a concelleira responsable da área, Miriam Louzao. Con todo, a alcaldesa puntualizou que queda "á expectativa" pola proposta final que chegue e aprobe o Parlamento.

O Concello presentou ao Goberno autonómico un segundo informe -e o seu propio proxecto de lei- que inclúe "un proceso participativo moi importante", segundo reivindicou Goretti Sanmartín ao ser preguntada polas condicións que expón a Xunta.

En concreto, Merelles referiuse a "que se teña en conta sempre o sector e a cidadanía nesta repartición" do recadado. "Pensamos que iso está máis que garantido", expuxo a alcaldesa.

Por último, a rexedora apuntou a que a Xunta "ten capacidade, recursos e todas as ferramentas" para ser a que xestionase este imposto, pero razoou que xa que trasladou que a recadación debía ser municipal como unha "liña vermella", Santiago "non ten máis remedio" que asumir estas "regras de xogo", dada a súa vontade de que a medida sexa implantada.

Imposto a excursionistas

O director de Turismo fixo alusión en varias ocasións ao carácter "especial" de Santiago de Compostela como destino turístico e, cuestionado por unha taxa a excursionistas, indicou que é unha cuestión en que se traballa.

Louzao, na súa quenda, aclarou que "son dúas cuestións diferentes" a taxa exposta para pernoitas e a que se aplicaría a excursionistas. Para esta última "está a traballar o Concello", co referente daqueles "que cheguen en autobús" xa que "non é posible" aos que o fagan "por outros medios". "Pero deixemos traballar aos técnicos", pediu.

Lexislacións semellantes "con matices"

As lexislacións en materia de taxa turística "van practicamente todas cara ao mesmo, con matices", segundo advertiu Xosé Merelles, en alusión ás de Cataluña, Baleares e a que non entrou en vigor en Valencia.

"Seguro que a nosa proposta vai incluír bastante da que propón o Concello de Santiago", acabou dicindo. Interrogado sobre se o custo do que se cobre se vai determinar nesta norma, respondeu afirmativamente e sobre a contía que traslada o Consistorio santiagués evitou"entrar a valorar", aínda que, segundo recoñeceu, a Xunta está "a traballar niso".