A Xunta publica no DOG a suba salarial do 2 % para os empregados públicos
A Xunta publica no DOG a suba salarial do 2 % para os empregados públicos
A suba do 2 % vaise facer efectiva xa na nómina de xullo e aplícase con efectos retroactivos desde xaneiro
![](https://img-g24-crtvg.flumotion.com/prog24/2022/20221023/FuncionariosdaXuntatraballanensancaetano.png)
A Xunta publicou este luns no Diario Oficial de Galicia (DOG) a orde de actualización das retribucións dos seus empregados públicos, que subirán un 2 % con efectos retroactivos desde xaneiro, despois de que o Goberno central aprobase a finais de xuño este incremento pactado cos sindicatos.
Deste xeito, o Executivo galego fará efectiva no mes de xullo esta suba para paliar os efectos da inflación. A medida xa estaba prevista na lei de orzamentos autonómicos para este ano, pero precisaba que a normativa básica estatal a habilitase.
Este aumento complementa o do 0,5 % xa adoptado en febreiro deste mesmo ano, porque se cumpriu a condición de PIB previsto. Por tanto, o incremento consolidado para os empregados públicos autonómicos será do 2,5 % neste 2024.
En concreto, o incremento adicional do 2 %, que se aplicará desde o 1 de xaneiro, supoñerá unha subida media anual de 782 euros nos salarios dos empregados públicos, cun custo para a Xunta de 97 millóns. En total, ambas as subidas implican un desembolso extra de 121 millóns e que os traballadores perciban case 1.000 euros máis en todo o ano.