Cada recuncho do Gaiás encheuse de fantasía nunha nova edición de Cidade Imaxinaria

Cada recuncho do Gaiás encheuse de fantasía na tarde deste sábado... Teatro, circo, maxia, música e unha infinidade de xogos amenizaban o lecer dos máis cativos na Cidade da Cultura.

"Eu o que vin foi o teatro e a orquestra", "hai moitos espectáculos e mola moito", "vin as randeeiras, os xogos, os mimos", din algúns dos cativos.

Un total de 14 propostas artísticas, con seis espectáculos e oito zonas de actividades e preto dun cento de artistas apostaron por un lecer compartido entre cativada e adultos... e semella que foi todo un éxito. Participaron centos de familias. 

"Cando vimos as actividades non o dubidamos, parecíanos un moi bo plan", di unha nai.

Tamén houbo espazos sensoriais para bebés, instalacións de realidade mixta, unha zona de petiscos para a merenda e a creación dun mural colaborativo con temática medioambiental.

"Que participen todos, que ademais hoxe estamos traballando con pinturas ecolóxicas", di Tati Peña, unha das monitoras.

"É moi divertido para pasar a tarde e non te aburres na casa", asegura unha nena.

Foi unha cita destacada para os máis pequenos da casa por conxugar na súa programación a vertente lúdica coa artística, a pedagóxica e a didáctica.