O Goberno comprométese ante a Xunta a establecer bonificacións na AP-53
O Goberno comprométese ante a Xunta a establecer bonificacións na AP-53
Preocupación na Xunta por posibles atrasos nas obras da alta velocidade entre Galicia e Portugal
A Xunta reclama unha interlocución directa con Renfe para abordar os problemas nas conexións ferroviarias
O conselleiro de Presidencia, Diego Calvo, reuniuse en Santiago co secretario de Estado de Transportes.
O Goberno galego trasladoulle a súa preocupación ante a falta de avances na conexión de alta velocidade con Portugal.
Hai pouco máis dun mes, o Goberno portugués garantiulle ao galego que o seu treito de alta velocidade ata a fronteira estararía rematado en 2032. Este xoves, o secretario de Estado de Transportes díxolle ao conselleiro de Presidencia que non cren que se cumpran estes prazos.
"Preocúpanos porque se o Goberno de España considera que non vai chegar nesa data, preocúpanos que atrase, ralentice ou non lles dea a prioridade necesaria a todos os trámites que hai que facer en España para poder chegar á fronteira no ano 32", afirmou Diego Calvo, conselleiro de Presidencia, Xustiza e Deportes.
Na mesma xuntanza, Calvo esixiu unha canle directa de interlocución con Renfe ante os reiterados atrasos e avarías, tanto nos trens de media distancia entre Vigo e A Coruña, como nos Avril que conectan por alta velocidade con Madrid.
"Gustaríanos saber ou ter información de primeira man de cales son os problemas que se están a producir, cales son os plans de actuación que vai poñer enriba da mesa Renfe para solucionalos e cando se van solucionar", explica Diego Calvo Conselleiro de Presidencia, Xustiza e Deportes.
Xunta e Ministerio reuníronse para analizar as obras ferroviarias e lóxisticas pendentes no Corredor Atlántico. Pese a levar ano e medio esperando esta xuntanza, o executivo central non puxo sobre a mesa obras, cifras nin prazos, aínda que si se acordou crear un grupo de traballo para desenvolver este plan. Na mesma xuntanza, o secretario de Estado de Transportes reiterou o seu compromiso de poñer en marcha as bonificacións para os usuarios da AP-53 entre Santiago e Dozón.
