A xustiza italiana ordena a Juana Rivas que devolva o seu fillo ao pai

A xustiza italiana volveu outorgar a custodia do fillo menor de Juana Rivas ao pai, Francesco Arcuri, nun fallo que ordenou á veciña de Maracena (Granada) que devolva o neno a Italia. Segundo os avogados da nai, que recorrerá o decreto, esta decisión non afecta á medida cautelar de protección ditada en España, que acordou que non regresase co seu proxenitor.

O fallo da Corte de Apelación de Cagliari destacou que a custodia do menor recae no pai, quen a exercerá "en exclusiva" e con quen debe vivir o menor. Tamén ordena á nai que o devolva "de inmediato" ao lugar de residencia do pai en Carloforte, Sardeña. Ademais, tamén limita o dereito de Rivas a velo só en Sardeña.

Juana Rivas recorrerá o fallo da xustiza italiana

Nun comunicado, Carlos Aránguez, avogado de Rivas, argumenta os motivos polos que recorrerán o fallo da Corte de Apelación de Cagliari, no que Arcuri está procesado en Italia por presuntos malos tratos ao seu fillo, de 11 anos. Por este motivo, considera "inaudito" que unha vítima, "máxime sendo un menor", deba convivir co suposto agresor.

Argumenta tamén o recurso en que, esta decisión separaría a Daniel do seu irmán maior, Gabriel, "que tras alcanzar os 16 anos e denunciar ao seu pai por maltratalo decidiu trasladarse a España para vivir coa súa nai".

Esta nova decisión, agrega, infrinxe a sentenza ditada pola Corte de Casación italiana, que "anulou radicalmente a anterior sentenza de instancia que tamén concedía a custodia a Arcuri".

Segundo Aránguez, a Corte de Casación italiana ordena ter en consideración que os irmáns han de vivir xuntos e que ha de prevalecer o interese superior do menor por riba de calquera outro. E "loxicamente, o interese superior de Daniel non é compatible con convivir cun pai procesado por maltratalo", engade.

O equipo xurídico de Rivas lembra que o tribunal encargado deste procedemento é a Sala do Mercantil da Corte de Apelación de Cagliari, "sen especialización na materia".

Isto é así, explica, porque a anterior decisión da Sala do Civil dese mesmo tribunal foi revogada pola Corte Suprema italiana, e non habendo outra sala do civil, pasou á especializada en Dereito Mercantil.

O menor continuará en España polo momento

Aránguez incide en que se trata dun menor de 11 anos que "expresou perante un Xulgado español que sente terror a volver vivir co seu pai".

Tras sinalar que Daniel queda de momento en España e que seguirán exercendo todas as accións que garantan o seu dereito a "unha vida libre de violencia", asegura que Rivas cumprirá "calquera instrución da xurisdición española sobre o menor, que é a que debe decidir sobre a súa protección, pois Daniel e Juana atópanse en España".

A corte italiana emitiu este decreto despois de que a Fiscalía do país solicitase que se concedese a Rivas "a garda e custodia en exclusiva" do seu fillo menor no transcurso da vista celebrada o pasado 17 de xaneiro, cando o caso quedaba visto para sentenza.

O menor permaneceu coa nai desde as datas do Nadal e Arcuri denunciara á súa exparella nos tribunais italianos por subtracción de menores tras expirar o prazo do 8 de xaneiro fixado pola Corte de Apelación de Cagliari para que o seu fillo pequeno regresase a Italia despois de pasar as festas do Nadal coa nai en España, dado que el tiña a garda e custodia.

Por outra banda, en España, o Xulgado de Violencia contra a Muller número 1 de Granada arquivou este luns a denuncia por violencia de xénero vicaria que interpuxo Rivas contra a súa exparella, á que acusa de "utilizar" os seus dous fillos para "danala" ao longo dos últimos oito anos.

No auto ao que tivo acceso, a maxistrada argumentaba que todos os episodios relatados por parte de Juana Rivas nesta denuncia "foron xa denunciados e atópanse xudicializados en distintos procedementos penais".