Ábalos pasa ao Grupo Mixto: "Non podo renderme, interpretaríase como signo de culpabilidade"

O exministro socialista José Luis Ábalos anunciou que mantén a súa acta de deputado no Congreso e que pasa ao grupo Mixto, co que desatende a esixencia do PSOE, que lle deu un prazo de 24 horas para deixar o seu escano polo caso Koldo, que investiga presuntas 'mordidas' en contratos de compra de máscaras durante a pandemia de coronavirus.

En conferencia de prensa minutos antes de que empezase o pleno do Congreso, Ábalos dixo que necesita defender a súa "honorabilidade" e que seguirá no Grupo Mixto para non enturbar as relacións co Grupo Socialista, á vez que sinalou que toma unha das decisións "máis duras" da súa vida e que nunca podería imaxinar estar "fóra das siglas do PSOE".

"Non podo renderme... Se eu renunciase neste momento interpretaríase como signo de culpabilidade e só provocaría a miña estigmatización non só política, senón persoal. Sei o que é ser un apestado", asegurou.

 

Ábalos, que se mostrou emocionado en ocasións e molesto coa falta de "compañeirismo" dalgúns compañeiros do PSOE, sinalou que se debe a aquelas persoas que lle rogaron que siga adiante e que "non se renda".

En todo momento invocou a súa "honorabilidade" e lembrou que non está acusado "de nada" nin forma parte da investigación do caso Koldo nin tampouco se beneficiou de "ningún enriquecemento ilícito".

"Non teño necesidade de invocar o principio de inocencia", proclamou.

O exministro deixou nas mans da xustiza a investigación do caso Koldo e asegurou que a querela sinala que o procedemento de contratación de compra de máscaras foi correcto cando el exercía como titular de Transportes.

Ante a decisión de pasar ao Grupo Mixto, unha decisión que cualificou de "drástica", Ábalos criticou os que lle pedían a súa renuncia á acta por motivos "éticos".

"Quen esixe a miña dimisión apela a unha suposta ética, pero non teñen en conta como reparalo se fago un sacrificio público. Cal sería a reparación e quen se acordaría de reparalo?", preguntouse.

Ao manter a acta de deputado, Ábalos mantén tamén a condición de aforado o que supón que, ante unha enventual investigación, esta recaería no Tribunal Supremo.

O xa exdeputado socialista, que este martes non acudirá ao pleno do Congreso, relatou que viviu un escenario "moi turbio" nas últimas horas, en que non puido establecer unha relación co seu partido, o que o levou a marchar ao Grupo Mixto, no que estará xunto cos deputados de Podemos, BNG, UPN e CC.

Nunha comparecencia sen preguntas, lamentou que non se viu apoiado pola dirección do seu partido, ao que contribuíu -puntualizou- para formar un goberno progresista e tras servir "como ministro a España".

"E axudando como secretario de organización ao PSOE para cohesionar a militancia en tempos complexos tras primarias de 2017. Gustaríame ter o beneficio do compañeirismo", recalcou. 

O PSOE  abriralle un expediente de expulsión

O PSOE suspendeu preventivamente de militancia o exministro e abre a vía para expulsalo do partido tras a súa decisión de manter a acta de deputado e pasarse ao Grupo Mixto, incumprindo así o ultimato da Executiva Federal para que renunciase ao escano.

Nunha resolución difundida aos medios tras a conferencia de prensa de Ábalos no Congreso, a Comisión Executiva Federal do PSOE resolve incoar un expediente disciplinario ao exministro e suspendelo preventivamente de militancia, en aplicación dos estatutos do partido.

O PSOE tomou esta decisión ao alegar que Ábalos incumpriu cunha esixencia da Executiva Federal, que o pasado luns lle deu un prazo de 24 horas para que renunciase ao seu escano ao considerar que ten responsabilidade política no caso no que está investigado o seu exasesor Koldo García, polo suposto cobro de comisións ilegais na compra de máscaras durante a pandemia.

Ademais, o PSOE indica que agora estudará en profundidade o caso, coa posibilidade de chegar máis lonxe coas sancións previstas se finalmente se probasen algunhas das faltas imputadas a Ábalos, con medidas como a suspensión de afiliación, a inhabilitación para cargos públicos e orgánicos por un período de entre 2 e 18 meses ou de 18 meses a 36 meses, e mesmo a expulsión do partido.

Todo iso dependerá de se o partido estima que Ábalos cometeu unha falta grave ou moi grave tras incumprir coa esixencia da Executiva Federal para que entregase a súa acta de deputado.

A partir de agora, Ábalos dispón dun prazo de cinco días para facer chegar ao instrutor do seu expediente en Ferraz as probas que estime oportunas para defenderse destas acusacións do seu propio partido.

Polo momento, a única decisión en firme é a súa suspensión cautelar de militancia, o que implica, segundo lembra o PSOE, que Ábalos está libre de todos os dereitos e deberes como militante socialista, excepto a obrigación de aboar puntualmente as cotas e de respectar as decisións políticas dos órganos de dirección. 

O portavoz no Congreso, Patxi López, quen anticipaba que o PSOE tomaría esta decisión tras a comparecencia de Ábalos, aseguro que "é un día moi triste".

López recalcou que a vontade do partido de Pedro Sánchez era que "Ábalos deixase o escano" e replicou o argumento de Ábalos de que renunciar agora "interpretaríase como un signo de culpabilidade" subliñando que o que lle pedía o PSOE "desde hai tempo" era que asumise a súa "responsabilidade política".