Abascal vese con Netanyahu en Xerusalén para eloxiar a firmeza de Israel e criticar o recoñecemento a Palestina
Abascal vese con Netanyahu en Xerusalén para eloxiar a firmeza de Israel e criticar o recoñecemento a Palestina
Abascal vese con Netanyahu en Xerusalén para eloxiar a firmeza de Israel e criticar o recoñecemento a Palestina
No encontro, que se prologou máis dunha hora na Oficina do Primeiro Ministro en Xerusalén, Abascal transmitiu a Netanyahu o apoio do seu partido ao pobo de Israel
Segundo informou Vox, Abascal denunciou que o presidente do Goberno estea "a tapar os seus casos de corrupción política e económica co recoñecemento do Estado palestino" e cos "ataques" ao presidente da Arxentina Javier Milei
![](https://img-g24-crtvg.flumotion.com/prog24/2024/20240529/abascalnetanyahu.jpg)
O presidente de Vox Santiago Abascal reuniuse este martes co primeiro ministro israelí Benjamin Netanyahu en Xerusalén e eloxiou a "firmeza" de Israel ante Hamas na guerra na Franxa de Gaza ao mesmo tempo que lle anunciou que revogará o recoñecemento do Estado de Palestina levado a cabo polo Goberno de Pedro Sánchez no caso de gobernar.
No encontro, que se prologou máis dunha hora na Oficina do Primeiro Ministro en Xerusalén, Abascal transmitiu a Netanyahu o apoio do seu partido ao pobo de Israel, ao que recoñece "o dereito para defenderse" e sinalou que o presidente do Goberno Pedro Sánchez non representa a España.
Segundo informou Vox, Abascal denunciou que o presidente do Goberno estea "a tapar os seus casos de corrupción política e económica co recoñecemento do Estado palestino" e cos "ataques" ao presidente da Arxentina Javier Milei.
O líder de Vox asegurou que mentres haxa un só refén en mans de Hamas e ata que non desapareza a organización terrorista, ningún Goberno nin ninguén ten dereito a pedir a Israel que renuncie ás súas operacións de autodefensa. Ademais, comprometeuse con Netanyahu no caso de gobernar a revogar o recoñecemento do Estado de Palestina, que, segundo reprochou, se fixo como premio de Sánchez a Hamas.
En Vox tamén sinalaron que o primeiro ministro israelí cualificou de "exemplar" a defensa do Estado de Israel por parte de Abascal, quen xa visitou dúas veces Israel durante a guerra na Franxa de Gaza, e lamentou a "inmensa intoxicación que domina a cobertura mediática do conflito nos países occidentais".
Vox explicou que Netanyahu se mostrou confiado en que Abascal defenda nun futuro a Israel desde o Executivo español e reiteroulle o seu apoio á soberanía da nación española, ao se mostrar en contra dunha moción no Parlamento israelí para recoñecer a independencia de Cataluña e País Vasco en resposta ao recoñecemento de Palestina, ademais de manter o seu "compromiso permanente en tarefas de loita antiterrorista" en Europa e tamén en España "a pesar da política hostil do Goberno de Sánchez", segundo denunciou.
Fontes da dirección de Vox precisaron a Europa Press que o presidente da Fundación Disenso, Jorge Martín Frías, formou parte da delegación que acompañou a Abascal a Xerusalén co eurodeputado Hermann Tertsch e Gabriel Ariza, encargado desde a Presidencia do partido das relacións internacionais xunto a Disenso.
A sintonía de Vox co Goberno de Netanyahu xa se demostrou o pasado 18 de maio, cando o ministro israelí de Asuntos da Diáspora e Combate contra o Antisemitismo, Amichai Chikli, participou no evento político Europa Viva 24 xunto a outros líderes internacionais, entre os que se atopaba o presidente da Arxentina Javier Milei.
O Goberno reprocha a Abascal que coa súa reunión atice "a guerra" e non estea ao lado da paz
O ministro de Asuntos Exteriores, Unión Europea e Cooperación José Manuel Albares reprochou ao líder de Vox Santiago Abascal que abrace as "teses máis extremistas" do Goberno de Israel e que atice "a guerra" en lugar de estar ao lado da paz.
Así se pronunciou o xefe da diplomacia española nunha entrevista en TVE, recollida por Europa Press, tras ser preguntado pola reunión que mantivo Abascal este martes en Xerusalén co primeiro ministro israelí Benjamin Netanyahu.
"O señor Abascal abraza esa política de trolas, de falsidades, de calumnias e de conxuras dos elementos máis extremos do Goberno de Netanyahu, e, desde logo, o que demostra é que non soamente non está no consenso da sociedade española, que maioritariamente anhelaba e apoia este recoñecemento (do Estado palestino), senón que tampouco está coa paz. E xa non está nin sequera coa máis mínima humanidade", sinalou.
Así, Albares lamentou que "mentres uns atizan guerras" outros atopan "solucións" para a paz e recriminou ao mesmo tempo a posición do Partido Popular ao redor deste conflito, que, ao seu xuízo, tamén "abrazou abertamente as teses máis extremistas" do Goberno israelí. Neste punto, lembrou que o expresidente Mariano Rajoy en 2014 puxo encima da mesa esa mesma proposición de lei para recoñecer o Estado palestino e votou a favor. "Iso é renegar do propio Partido Popular", apostilou.
"Vexo que neste caso o Partido Popular volve ás súas orixes e volve ás orixes de descoñecer o máis elemental dereito internacional", manifestou Albares. No mesmo sentido se pronunciou nunha mensaxe na rede social X a vicepresidenta primeira e ministra de Facenda María Jesús Montero, que criticou a reunión entre Abascal e Netanyahu e lembrou que o líder de Vox sería vicepresidente se sumase con Feijóo. "Pero os españois decidimos que non gobernase a dereita coa ultradereita. Eliximos parar os pés ás forzas reaccionarias e optamos polo progreso. E agora toca facelo en Europa", remarcou.