Cáritas abre unha nova tenda en Ourense
Cáritas abre unha nova tenda en Ourense
Son establecementos solidarios, que se nutren das doazóns ao roupeiro da ONG
Pretenden dignificar o acceso dos máis necesitados a algo tan básico como a roupa e o calzado
En plena Praza Maior de Ourense, a escasos metros do concello, abre as súas portas a nova tenda de Cáritas en Galicia. Nútrense das doazóns que chegan ao roupeiro de Cáritas e tamén de empresas do sector.
"Produto de primeira e de segunda man. O que se busca é que cumpran as mesmas funcións que tiñan os rouperios: para nenos, homes e mulleres e tamén roupa de cama", explica María Luz Jorge, unha das promotoras da tenda.
As persoas que o necesitan poden adquirilas a custo cero mediante unha acreditación cun código QR, sen que o resto dos clientes saiban se pagaron ou non.
"O que se busca é a dignificación da entrega. Os roupeiros fixeron un labor inmellorable durante moitos anos, pero, co paso do tempo, o que se procura é que estas persoas se sintan integradas", sinala María Luz.
Tamén hai un obxectivo de integración laboral para persoas en risco de exclusión social. Os beneficios que xeran as tendas, destínanse a este fin.
"Unha persoa que antes doaba un pantalón, agora, ademais, xera emprego e fomenta o consumo responsable. Creo que non se lle pode pedir máis a unha simple acción", di María Tabarés Domínguez, directora de Cáritas Diocesana de Ourense.
Malia que Cáritas ten máis puntos de distribución, esta é a oitava tenda destas características na nosa comunidade, 150 en toda España.
