Polémica polo adianto de varias festas de fin de ano en Galicia para salvar as restricións

Ante as suspensións de fin de ano, algúns establecementos convocan hoxe os clientes. Malia as axudas, hai discotecas que decidiron non renunciar á que pode ser a caixa máis grande do ano. Esquivan así as restricións horarias, porque hoxe aínda poden estar abertas ata as cinco da mañá.

Porén, o presidente da Xunta pediu ao sector do ocio nocturno que pare todas as festas de Noitevella, tanto as previstas para o 31 como as que se adiantan a esta data, advertindo aos empresarios que adiantar a festa suporá non ter dereito ás axudas da Xunta.

"Quero pedir ao ocio nocturno que pare todas as festas de fin de ano e que se una ás axudas que a Xunta pon á súa disposición", instou o presidente, e dixo que a media das contías será de 6.000 euros, aínda que superan os 40.000 para os locais máis grandes e quedan en 2.500 euros para os máis pequenos.

Ademais, apelou aos empresarios do sector do ocio nocturno á "corresponsabilidade" cos cidadáns para que "preserven a saúde e a economía" nun "momento moi delicado" pola evolución da pandemia.

Por iso, algunhas discotecas da Coruña decidiron suspender a festa de Fin de Ano que adiantaran para este mércores. O xerente da Sala Pelícano, Luís Diz, explicou que finalmente decidiron non abrir tampouco esta noite porque a Consellería de Sanidade trasladoulles “datos moi preocupantes” de contaxios. “Cremos que os casos van subir igual porque a xente non vai quedar na súa casa en fin de ano e celebraranse festas privadas, pero non será pola nosa culpa”, sostivo Diz.

O tamén presidente de Galicia de Noite cre que as restricións “estigmatizan o sector”, pero recoñece que “non ten sentido estirar o chicle”. “Non temos expectativa”, lamentou sobre unha futura data de reapertura.