Alicia Fernández entra na lista de xogadoras que optan aos xogos olímpicos
Alicia Fernández entra na lista de xogadoras que optan aos xogos olímpicos
O seleccionador deu a coñecer unha convocatoria de vinte da que terá que facer tres descartes
A primeira parte da preparación será na Guarda
A valdoviñesa Alicia Fernández está moi preto de participar nos seus segundos Xogos Olímpicos. Alicia foi incluída na lista de vinte da que o seleccionador terá que facer tres descartes. A galega é unha habitual na selección de balonmán feminino e, de non acontecer ningún accidente, todo apunta a que será unha das elixidas.
O equipo comezará a súa preparación o 17 de xuño e farao en terras galegas. Durante quince días estarán na Guarda aproveitando as instalacións da Sangriña para facer a primeira parte da concentración. Logo irán a Donostia antes de viaxar ata París.
A valdoviñesa Alicia Fernández @aali_fernandez, entre as 20 elixidas para os Xogos Olímpicos
— En Xogo tvG2 (@EnXogo_tvG2) June 4, 2024
🗓️ O 17 de xuño a selección de balonmán feminino concentrarase na Guarda, onde permanecerá 2 semanas
👉 Haberá 3 descartes
🤾♂️ Tamén entra na lista a xogadora do @BmPorrino Paulina Buforn pic.twitter.com/PLicgZ8hT7
O Conservas Orbe Rubensa Porriño, cuarto clasificado da Liga Guerreras, tamén achega unha xogadora á selección: Paulina Buforn. A eivisenca é outra das habituais para o técnico nas últimas grandes citas.
Alicia Fernández xa estivo presente nos xogos de 2021 e os de París, con 31 anos, chéganlle en plena madurez deportiva. Consolidada nunha competición tan potente como a de Romanía, vén formando parte do combinado desde hai case unha década e estivo no equipo que acadou a prata no Mundial de 2019.
