Elena Martínez perde o que resta de tempada co Mecalia
Elena Martínez perde o que resta de tempada co Mecalia
Sofre “unha rotura do ligamento cruzado anterior e dos meniscos do xeonllo dereito”
A súa baixa únese á xa coñecida de María Sancha, lesionada durante a pretemporada
A lateral esquerdo valenciana Elena Martínez perderá o que resta de tempada despois de que as probas médicas revelaran que sofre “unha rotura do ligamento cruzado anterior e dos meniscos do xeonllo dereito”, informou este luns o seu club, o Mecalia Atlético Guardés.
A primeira liña lesionouse o pasado sábado 5 de outubro durante o partido que enfrontou ao seu equipo co Rocasa Gran Canaria na cuarta xornada da liga Guerreiras Iberdrola. Elena Martínez pasará polo quirófano nas próximas semanas e, unha vez sexa intervida, poderá coñecerse con máis exactitude o tempo que deberá permanecer de baixa, aínda que non será inferior aos seis meses.
🔴 PARTE MÉDICO
— Mecalia Atlético Guardés (@Atlguardes_ofic) October 14, 2024
Elena Martínez sofre unha rotura de ligamento cruzado anterior e meniscos no xeonllo dereito. Nos vindeiros días será operada e comezará o seu proceso de recuperación, que durará o que resta de tempada.
Moitísimo ánimo, @elenaamr11 ❤️🩹💪 Volverás con máis forza! pic.twitter.com/JPvI1hf9tq
A súa baixa únese á xa coñecida de María Sancha, lesionada durante a pretemporada e aínda en proceso de recuperación dunha rotura do cuarto metacarpiano da man dereita. Ademais, Xasmín Mendoza é dúbida para o próximo partido ligueiro por unha escordadura de nocello.
