A Guarda autoriza a apertura de 17 atraccións de festa, entre elas o Saltamontes
A Guarda autoriza a apertura de 17 atraccións de festa, entre elas o Saltamontes
Algunhas atraccións aínda non recibiron a autorización municipal para a súa apertura e, en caso de facelo, será "baixo a súa conta e responsabilidade"
Os técnicos municipais do concello da Guarda validaron a documentación presentada por 17 das 26 atraccións instaladas para traballar durante a Festa do Monte. Entre as que xa poden operar está o Saltamontes.
O permiso chegou case á mesma hora en que parte dos feirantes se dispuñan a volver abrir sen permiso, asegurando que tiñan todo en regra e garantida a seguridade das atraccións.
"A seguridade non a dan eses papeis, nin sequera as inspeccións. A seguridade depende dun mantemento correcto", aseguraba Loli Balsa, secretaria da Asociación de Atraccións de Feira de Galicia.
O concello da Guarda publicou na súa páxina web a listaxe das atraccións que teñen permiso. E advirten que as que abran sen telo farano baixo a súa responsabilidade. Tamén que o Concello reserva emprender accións administrativas e legais contra eles.
"Coa seguridade das persoas e coas normas administrativas non se debe xogar", apuntaba unhas horas antes o alcalde, Roberto Carrero.
Os feirantes quéixanse dos días perdidos sen traballar.
"Aquí estamos para facer cartos. Necesitamos abrir e imos abrir ata que rematen as festas", dicía un feirante.
Segundo o concello non houbo tardanza na revisión da documentación senón que os feirantes a presentaron cando as festas xa estaban en marcha.
