Ambiente de festa en Ferrol ás portas da cita histórica do Baxi
O equipo de baloncesto feminino xoga a final da Eurocup na localidade francesa de Lille
Podes seguir o partido en directo aquí
En Ferrol contan as horas para a festa desta tarde. A gran final da Eurocup que levou a Francia as xogadoras de baloncesto do Baxi Ferrol. Desde primeiras horas da mañá todo son preparativos para acompañar o equipo nesta data histórica. Nas rúas, nos comercios, na hostalería. En Ferrol respírase ambiente de festa desde os primeiros cafés da mañá. "Hai moito ambiente tanto entre a xuventude coma a xente de idade", explica un hostaleiro.
Hai mesmo rituais entre os afeccionados, que nunha xornada coma a de hoxe non poden faltar. "Pintamos as uñas, poñemos os calcetíns e hoxe tamén a camiseta", di unha afeccionada.
Toda a cidade vive implicada co esforzo dunhas xogadoras que deixan pegada en cada partido. "Son un exemplo de valores sobre todo para os pequenos", asegura unha comerciante.
O partido xogarase na localidade francesa de Lille a partir das oito da tarde. Poderán seguilo en directo a través da TVG2 e dos micrófonos da Radio Galega. "Que xoguen ben, que gocen do partido e mañá a celebralo coa copa no peto" é o desexo dun afeccionado.
