"Non é de recibo é que a patronal pretenda que isto o paguemos os de sempre"

"Se as cousas seguen como ata o de agora, co bloqueo por parte da patronal dos convenios colectivos, pois si, creo que sairemos á rúa", advirte Amelia Pérez, secretaria xeral de Comisións Obreiras en Galicia, ante a perspectiva dun outono "quente" no que haxa un incremento da conflitividade laboral.

O primeiro atranco está xa na negociación do salario mínimo interprofesiona (SMI). "Vai estar complicado. Nós somos bastante escépticos, pero temos claro que hai un compromiso por parte do Goberno e unha folla de ruta claramente marcada, e ese compromiso de chegar ao final da lexislatura con ese 60 % do salario medio e polo tanto con ese incremento do salario mínimo que xa agora tal e como están os datos da inflación é que é imprescindible", asegura a responsable galega de CC. OO., nunha entrevista no programa 'Bos días' da Televisión de Galicia.

Para abordar a situación, Amelia Pérez fai recaer a maioría da responsabilidade nas administracións, pero non toda: "A maioría teñen que ser políticas públicas de todas as administracións. Pero logo, por suposto, podemos chegar a acordos todos os interlocutores sociais para intentar asumir esta situación entre todos e todas. O que non é de recibo é que a patronal pretenda que isto o paguemos os de sempre", asegura con contundencia.

Pacto de rendas

A secretaria xeral de Comisións Obreiras tamén advirte sobre a negociación do pacto de rendas: "A nós chamáronnos a primeiros deste ano para abordar ese pacto, que nós temos claro que non é só de salarios. E a patronal desde o principio xa dixo que non se ía sentar para falar de beneficios empresariais, e o Goberno no acaba de arrincar un pouco con esa situación".

"Nós se temos que sentar a falar de pacto de rendas, ímolo facer, pero temos que falar de salarios, beneficios empresariais, de prezo da vivenda, de reforma fiscal..., en definitiva, de todas a situacións", asegura.

Nesa negociación, a inflación e a perda de poder adquisitivo por parte dos traballadores sitúase nun plano principal, pero segundo Amelia Pérez, os sindicatos están dispostos a ser flexibles: "Somos conscientes de que non todas as empresas poden asumir a suba da inflación que temos agora mesmo, pero o que si introducimos nese acordo que facíamos con UXT son esas cláusulas de garantía salarial que permitan a medio prazo garantir ese poder adquisitivo que levan perdendo os traballadores e as traballadoras".

Respecto á situación galega, establece dous ámbitos onde cre que se debe poñer o foco: "Galicia en eivas que ten que seguir superando. A administración autonómica ten deberes. Estamos perdendo peso industrial. E despois tamén a situación demográfica non axuda. Os mozos acaban marchando. É un traballo que require tempo e que a administración galega se poña a estudala".

Perspectivas boas respecto ao emprego

A evolución do emprego nos próximos meses cre Amelia Pérez que é "difícil de prognosticar".

"A palabra clave é a incerteza. O que temos claro é que os datos de contratación foron moi bos pola reforma laboral, e cremos que vai seguir sendo así. Evidentemente estamos á fin dunha temporada estival, e os contratos que foron feitos para as vacacións se van desfacer", augura.

"Pero iso non quere dicir que non miremos toda a evolución desde o principio de ano. Os datos de contratación e de indefinición son bos. A final de ano haberá que mirar como son, pero as perspectivas son boas", conclúe.

Sectores que non atopan traballadores

E en canto aos sectores que aseguran ter dificultades para atopar traballadores, a responsable en Galicia de CCOO, remítese a un estudo realizado polo sindicato: "Hai algúns sectores nos que non hai man de obra porque o traballo é precario, porque a patronal segue instalada en prácticas que son terceiromundistas, e evidentemente hai que ir mudando iso. A xente quere ter unhas condicións salariais e laborais dignas que permitan facer un proxecto de vida".

Aínda que si hai ámbitos onde as dificultades para conseguir atopar traballadores: "como o da construción. Alí é diferente. Na anterior crise houbo xente que se foi a outros sectores e a maioría deles non van volver". 

"Pero na maioría deles, como a hostalaría ou o transporte son sectores con condicións moi malas, e a xente non está disposta a traballar así", conclúe Amelia Pérez e fala da receita: "Mellores condicións salariais e laborais. Salarios e uns horarios dignos, non facer 12, 13 ou 14 horas, senón facer unha xornada decente".