Ana Miranda pide medidas para reducir as marxes das grandes distribuidoras de alimentos

Ana Miranda estrea escano no Parlamento Europeo co obxectivo de centrar a lexislatura nas medidas anticrise e na defensa do sector primario galego. Nunha entrevista no Galicia por Diante, a eurodeputada nacionalista dixo ver con bos ollos os intentos da vicepresidenta Yolanda Díaz por acordar unha cesta da compra a prezo reducido, pero quere máis:

"A idea está ben, a cuestión é que non vén de agora o problema, vémolo co leite en Galicia, que a distribución leva unha grande parte dos prezos dos alimentos. Non só hai que ir a un pacto coas grandes distribuidoras, senón a unha regulación real de que ao produtor e produtora lle chegue máis".

A defensa do sector primario galego é outro dos obxectivos que marca Miranda, que critica o ataque que está a recibir a pesca do arrastre galega ao limitarse a súa área de actuación: "Cremos que isto é unha estratexia da Comisión Europea que está querendo quitar os que compiten, como neste caso a flota galega, creando unha imaxe de que se esquilma e de que é prexudicial; o arrastre regulado e cos paros biolóxicos suficientes está perfectamente asumido".

Miranda tamén insistiu na denuncia do "espolio eólico" que ó seu ver se está dando en Galicia, coa instalación de macroparques que incumpren a normativa comunitaria, tal e como denunciou a súa formación en Bruxelas o pasado agosto.

A eurodeputada falou tamén da petición presentada polo Bloque para que o Parlamento Europeo se pronuncie a favor dunha investigación profunda sobre as causas do afundimento do Villa de Pitanxo. Neste sentido, Miranda confía en que a Eurocámara aprobará esa declaración "seguramente con unanimidade".