Apagan un incendio de grandes dimensións que durou máis de seis horas en Narón
Apagan un incendio de grandes dimensións que durou máis de seis horas en Narón
O lume obrigou a cortar o tráfico na estrada que une a rotonda da Trincheira co acceso á autoestrada polo Couto
Un incendio na maleza da avenida do Mar, e que se mantivo activo durante máis de seis horas na madrugada do sábado, obrigou a cortar o tráfico no polígono da Gándara en Narón. Pechou o acceso á autoestrada polo Couto durante a noite.
Os bombeiros de Narón lograron extinguir as lapas contra as sete e media da mañá. Por fortuna o incendio non deixou feridos.
O lume produciuse durante a madrugada na Avenida do Mar e esixiu un intenso labor por parte dos equipos de extinción. Foron varios os particulares que chamaron ao 112 Galicia poucos minutos antes da 01:00 para dar conta dos feitos e solicitar a intervención.
Os xestores do 112 pasáronlle aviso aos bombeiros de Narón, ao distrito forestal da zona e tamén á empresa subministradora de electricidade. Unha vez no lugar, os equipos de emerxencia traballaron ata a completa extinción das chamas, que sucedeu preto das 7:30 horas desta mañá.
As lapas calcinaron unha importante cantidade de restos de podadura que estaban acumuladas nas proximidades do Polígono.
Precisouse tamén un guindastre para remover a madeira e poder así arrefriar as brasas do fondo.
