Aparece un corpo preto de Cabo Home, onde se localizou o coche da muller desaparecida en Moaña

Esta mañá localizaron un cadáver nunha zona rochosa entre a praia de Barra e o faro de cabo Home en Cangas. Á falta de confirmación oficial, todo parece indicar que se trata da muller de 52 anos de Moaña que desapareceu hai unha semana.

Marchara co seu coche o mércores pasado, polo que a busca se centrou en localizar o vehículo. Apareceu onte á tarde aparcado na zona de cabo Home. Esta mañá un mariñeiro alertou as forzas de seguridade ao avistar un corpo nunha zona de cantís de difícil acceso. Para rescatar o corpo foi necesaria a intervención dun helicóptero da Garda Civil.