Arufe, a aldea de Cotobade que quedou abandonada nos anos 80
No lugar quedan as ruínas de catro casas de labranza cos seus canastros
A última veciña que viviu na aldea marchou para Pontevedra en 1984
Desde a igrexa de Loureiro, Hermitas e Dolores collen o camiño empedrado que leva a Arufe, unha aldea do concello de Cotobade que leva 40 anos abandonada.
"Este é o centro de Arufe. Aquí hai dous canastros. A casa era preciosa. A familia marchou para Barcelona, a casa quedou abandonada e o tellado caeu".
Seguindo o camiño pola carballeira, atopamos a casa na que viviu a última veciña da aldea. Marchou de Arufe a mediados dos anos 80. Hoxe aínda son visibles as pegadas da vida que quedou atrás.
"Aquí todo o mundo tiña vacas, todos se dedicaban á labranza. Aquí era o pozo onde bebían as vacas. E alí había un pío onde lavaban a roupa".
Na aldea había catro casas de labranza. Uns marcharon para Barcelona, outros para Pontevedra e Huelva. No camiño de volta, Hermitas e Dolores levan con elas as historias daqueles que un día encheron de vida este lugar.
