A choiva das últimas semanas fai remitir "o peor" da seca

A choiva das últimas semanas, cun 36 % máis de precipitacións respecto a os valores habituais no mes de outubro, provocaron o aumento xeneralizado do caudal dos ríos e do nivel dos encoros, polo que "o peor pasou xa", afirmou este martes a conselleira de Infraestruturas e Mobilidade, Ethel Vázquez.

Vázquez presidiu, xunto á directora de Augas de Galicia, Teresa Rodríguez, unha reunión da Oficina Técnica da Seca, na que constataron a mellora xeneralizada da situación, cun aumento do caudal nos ríos de Galicia Costa -a demarcación dependente do Goberno galego- do 800 % entre o 15 de outubro e o 1 de novembro.

En calquera caso, é preciso seguir "vixiante", advertiu Gutiérrez, xa que "o normal" no outono e inverno é que chova e, polo tanto, poida continuar a melloría da situación e falar de "normalidade", aínda que un par de meses sen choiva volvería facer saltar as alarmas, explicou.

Na reunión deste martes, a Xunta decidiu desactivar a situación de seca prolongada na Mariña, Ortegal e Cedeira; mentres que continúa activa no resto de Galicia.

En canto á situación de escaseza de auga, pasouse de prealerta a normalidade na conca dos ríos Verdugo e Lérez; e tamén nas concas do Anllóns, o Tambre e o Grande.

Mantense a prealerta por escaseza na conca do río Mero e na zona de Zamáns e Baiona pásase de alerta a prealerta.

O nivel dos encoros na demarcación Galicia Costa é do 65,2 % de media, co de Eiras -o de maior tamaño- con "máis do 80 %", o de Baiona ao 94 % e o de Baiona a 64,5 %; mentres que o de Cecebre está ao 51 %.