A chuvia de Aninovo segue causando derrubamentos
A chuvia de Aninovo segue causando derrubamentos
O río Carrás abriu un buraco de grandes dimensións nunha estrada de Maside
No Carballiño, seguen as obras na estrada Alberto Vilanova, onde se formou outra gran fenda
Empezou como unha fenda no asfalto, e así vai: dez días despois da riada, o buraco que o río Carrás abriu no límite do concello de Maside co do Carballiño alcanza os seis metros de diámetro e ameaza con seguir cedendo.
"Debe ter seis metros de diámetro e dous de fondo e o problema é que, se segue rompendo, pode chegar á estrada pola que pasan máis coches, que vai a Facenda, a onde están os médicos", explica Fernando Pérez, un dos veciños afectados.
Non é o único punto afectado. Só uns metros máis alá, ao pé do enlace da autovía de Santiago co Carballiño, a plataforma de asfalto caeu directamente sobre o río, converténdose nun auténtico dique. "Había tres metros de altura e agora quedan 50 ou 60 centímetros. Se vén a metade de auga que o outro día, volvemos ter o mesmo problema", di Fernando.
Os veciños temen que as imaxes da riada que eles mesmos captaron o día de Aninovo, se repitan se volve chover, aínda con peores consecuencias polo tapón do leito.
"Encheuse todo de auga: a terraza, a pista... Un desastre. Se volve chover así, volverá pasar o mesmo. Teñen que arranxalo", comenta Andra, traballadora da gasolineira da zona.
Tamén no Carballiño
As mesmas chuvias provocaran tamén estoutro derrubamento sobre o río Carrás, ao pé do centro de saúde do Carballiño. Leva máis dunha semana en obras. "Non podes vir en coche, non podes pasar... Un horror. E menos mal que non colleu ningún coche", di unha veciña.
Os peóns xa poden circular, pero o tráfico aínda vai tardar. Os operarios quitaron o asfalto que quedaba para reparar a ponte en condicións.
