As datas clave do 28-M: o calendario ata a xornada electoral
As datas clave do 28-M: o calendario ata a xornada electoral
Renóvanse os 8.131 consistorios e os parlamentos de 12 comunidades autónomas
Durante esta semana notificaranse os integrantes das mesas electorais
O prazo para solicitar o voto por correo acaba o 18 de maio
Os votantes das sete cidades terán menos listas entre as que escoller
Despois de 3 anos e medio sen ningunha convocatoria electoral, a finais de mes os españois volven ás urnas.
Máis de 35 millóns están chamados a renovar a composición dos 8.131 concellos do país. Para a metade destes electores, o 28 de maio a decisión é dobre: en 12 comunidades tamén se van renovar os parlamentos autonómicos.
Para algúns, haberá mesmo unha terceira tarefa: axudar a que todo saia ben desde unha mesa electoral. Ata este mércores, está en marcha o sorteo. Calquera español menor de 70 anos pode recibir a notificación ata o vindeiro sábado. Unha semana despois, estaremos xa en campaña.
Nas eleccións municipais non poden participar os españois residentes no estranxeiro, pero si case medio millón de estranxeiros que viven entre nós.
Quen ese día non estea na súa localidade, pero siga en España, pode votar por correo. Ten ata o 18 de maio para pedilo e ata o 24 para levar a papeleta a unha oficina postal.
Nas autonómicas, si poden votar os españois que viven noutro país, que por primeira vez non terán que solicitar a papeleta por adiantado.
A próxima semana, o venres 12, comeza a campaña electoral. Remata o venres 26 , o 27 é a xornada de reflexión e acudiremos ás urnas a votar o 28 de maio.
As únicas comunidades onde non se renova agora Parlamento son as catro históricas, entre elas Galicia, e tamén Castela e León, que adiantou os comicios en 2022.
