As lapas arrasan un palleiro en Vimianzo con 60 toneladas de pacas

Un incendio arrasa un palleiro no lugar de Reparada, en Vimianzo, con 60 toneladas de pacas de herba seca. As lapas comezaron pasadas as doce e media da noite, e non foi ata case once horas despois cando os bombeiros deron por rematadas as tarefas. A orixe puido estar na fermentación da mesma palla.

A columna de fume apreciábase esta mañá desde lonxe. Foi todo case cuestión de sorte pois o propio dono, quen agardaba por un camión para cargar varias das súas vacas, foi o que chamou ao 112 ao ver as lapas. Eran as doce e media da noite e o palleiro está moi preto da vivenda.

"Puxémonos á tarefa de arrefriar porque o problema non era o palleiro, iso xa estaba perdido cando comezou. O problema é que hai outra explotación máis grande ao lado e era preciso evitar que prendera tamén" explica Jesús Felípez Pazos, Cabo xefe Bombeiros Costa da Morte. Engade que a orixe do incendio é incerta "non había maquinaria arredor nin tampouco electricidade". 

Tanto a estrutura como o almacenado neste palleiro xa estaba perdido, unhas 60 toneladas de herba seca pero o fundamental era evitar que o lume se propagara, por iso se puxeron todos os medios dispoñibles para sufocar o lume.

"Foi un traballo duro e o consumo de auga foi enorme. Tan só nós gastamos uns 140.000 litros" di, pois neste tipo de tarefas tan só podes "arrefriar, arrefriar e non hai extinción posible. Só podemos sacar a palla e levala a unha leira na que non provoque estragos e déixase arder", indica o cabo xefe de bombeiros.

Precisaron mesmo a colaboración de veciños. "Chegou un ás catro da mañá cunha escavadora e comezou a retirar e logo, dúas horas máis tarde, outro". 

Traballo duro ata ben pasadas as once da mañá, pero que grazas a iso non houbo que lamentar danos persoais e as perdas materiais calculan que chegan case aos 30.000 euros. Amais dos Bombeiros de Cee interviron tamén os de Santa Comba, o GES Ponteceso, a Garda Civil e Protección Civil de Vimianzo.