As mariscadoras de Lourizán volven ao traballo seis meses despois

Despois de seis meses, as mariscadoras de Lourizán volvían ao traballo. No inverno, as enchentes mataran a maioría do produto. Na mañá do luns, sen saber se habería ameixa, camiñaban cara ao medio da ría cruzando os dedos.

Unha hora despois, volvían para terra e todas conseguiran apañar o tope de cinco quilos. É o resultado de seis meses de sufrimento e de traballo: arando na area, remexendo os fondos, loitando contra os depredadores, trasladando marisco.

O día seguinte volverán ao traballo, coa esperanza de que sexa de certo unha volta á normalidade.