Decepción entre as mariscadoras de Noia na segunda xornada da campaña tras unha parada de dous meses

Segunda xornada de traballo en Noia tras a reapertura este luns da campaña de marisqueo. Dispoñen de 3 horas e media para coller as cotas de berberecho e ameixa estipulados: 3 quilos de cada un.

Pero o desánimo impoñíase entre as mariscadoras antes de baixar á praia tras os resultados de onte. Nin o tamaño do produto, nin a cantidade nin os prezos cumpriron as expectativas.

O berberecho de cuarta non chegou aos 3 euros o quilo na lonxa, o de terceira a 7, a ameixa xaponesa pagárona a 9 euros e a escasa fina a 34. Con esta premisa, as expectativas para esta segunda xornada tampouco son optimistas.

A elevada mortaldade atribúena a varios motivos como explica Maria Piñeiro, da Agrupación de Mariscadoras de Noia: desde a apertura indiscriminada das comportas do encoro do Tambre, ata as riadas polos últimos temporais ou a contaminación.

A confraría noiesa tiña previsto manter a campaña ata a Semana Santa, pero, á visita dos resultados, ven complicado que se poida alongar tanto.