As mellores festas, festivais e concertos desta fin de semana

Festas

● Festas do verán de Ferrol. Ademais dos concertos de Beret, Coti e Abraham Mateo, esta fin de semana tamén se celebrarán as festas na parroquia de Covas e a festa do choco en Caranza. Ademais, o deporte tamén será protagonista grazas ao Rally de Ferrol e ao surf do Pantin Classic en Valdoviño.

● Entroido de verán en Redondela. Disfraces, concertos, DJ, unha gala drag, inchables e festa da escuma para os máis cativos e moita diversión durante toda a xornada do sábado 24 de agosto.

● Festa do Esquecemento en Xinzo de Limia. Recreación do momento histórico no que os romanos chegaron ao río Limia. Contará con actividades desde o venres ata o domingo.

● Festa da Vendima en Leiro. Festa vitícola con desfile de carrozas, mercado de artesanía e música, o sábado 24 de agosto.

● Festas de María Pita na Coruña. Continúan as festas de agosto na cidade, con representacións teatrais, feira do libro e celebracións nos barrios de Castrillón (ata o venres 23) e da Sagrada Familia (entre o venres 23 e o domingo 25).

● Os Caneiros en Betanzos. A segunda xira dos Caneiros polo río Mandeo será o domingo, pero antes poderase gozar do resto das festas da cidade e dos concertos de Chenoa e Shophie Simmons, o sábado.

● Festival Agrocuir da Ulloa. O festival pola diversidade sexual, afectiva e de xénero no rural celebrarase o venres 23 e o sábado 24 en Monterroso.

● Festa da Malla Tradicional de Doade. Festa dedicada a esta técnica agrícola e acompañada por música e unha mostra de artesanía na parroquia lalinense.

● San Roque en Vilagarcía. Verbenas, concertos, a batalla naval, o desfile de carrozas ata o domingo 25 de agosto e moitas risas na FestaClown.

● San Bartolomeu de Noia. Los Secretos, Natalia, Luar na Lubre, verbenas e moito máis desde o venres 23 ata o luns 26 de agosto.

● Festas do Cristo en Cangas. Arrincan o venres 23 de agosto cunha programación ateigada de verbenas, concertos e misas, que se estenderá ata o sábado 31 de agosto.

● Festas Patronais de Chantada. Comezan o xoves 22 de agosto e estenderanse ata o martes 27. O Folión de Carros, un dos eventos máis destacados, será o sábado 24.

● Descenso Internacional do Río Miño. Competición deportiva na que os piragüistas farán un percorrido de 14 quilómetros desde Salvaterra do Miño ata a ponte internacional de Tui.

● Mostrart na Coruña. Última semana para visitar a feira de artesanía, que estará aberta ata o domingo 25 de agosto.

Citas gastronómicas

● Festa da Empanada da Bandeira. Cita gastronómica con música e xogos populares entre o mércores 21 e o sábado 24.

● Festa do Viño do Condado de Tea. Salvaterra de Miño acolle esta festa gastronómica con animación musical entre o venres 23 e o domingo 25.

● Festa do Percebe na Guarda. Cita gastronómica entre o venres 23 e o domingo 25.

● Festa do Requeixo na Capela. O domingo 25 de agosto é a oportunidade perfecta para degustar este produto e gozar xogos tradicionais, a maxia e a música.

● Romaría do Pan de Millo de Cabral. O domingo tamén será o momento idóneo para probar este delicioso pan, ademais doutros pratos típicos, acompañados de música tradicional.

● Romaría de Naseiro en Viveiro. Tamén coñecida como Romaxe do Bo Xantar, pola súa oferta gastronómica, protagonizada este venres polo día do polbo. Tampouco faltarán a música e as misas, entre o 23 e o 27 de agosto.

Festivais e concertos

● Río Verbena Fest. A terceira edición deste festival celébrase en Pontevedra entre o venres 23 e o sábado 24 de agosto:

• Amaral, Lory Meyers, Viva Suecia, Dani Fernández, Baiuca, Siloé, Mikel Erentxun, Vicco, Michenlo, Los Zigarros, Nebulosa, Galician Army, Sarria, Alcalá Norte, Son das Tabernas, Four Passengers, Joana Romero, Blacks Stones, Mamasunción e Law.

● Festival da Luz. Ata 42 artistas e bandas reúnense en Boimorto entre o venres 23 e o domingo 24:

• Mägo de Oz, Luz Casal, Veintiuno, Fillas de Cassandra, Los Zigarros, El Kanka, Ortiga, Grande Amore, Lontreira, Marlena e moitos máis.

● Extruga na rúa. Festival de música e cultura urbana en Verín o 24 e 25 de agosto:

• Cora Novoa, Boyanka Kostova, Grande Amore, Dirty Suc, Pappaquino e Willow GHZ.

● Costa Feira. O xoves 22 actuarán en Sanxenxo Coque Malla e Sidecars, mentres que Natos y Waor pecharán o festival o sábado 24 de agosto.

● Son do Mar: Miriam Rodríguez, Andrés Suárez e Yoly Saa actuarán o sábado 24 de agosto no Grove.  

● Atardecer no Gaiás. O dúo Alarido actuará no ciclo de concertos de Santiago este venres.

● Beret estará nas festas de Ferrol o xoves 22 ás 22:00 horas.

● Coti: o cantautor arxentino actuará nas festas de Ferrol o venres 23 ás 22:00 e no entroido de Redondela ás 00:30 horas na noite do sábado para o domingo.

● Abraham Mateo tamén estará nas Festas de Ferrol, o sábado ás 22:00 horas.

● Los Secretos estarán en Noia o venres 23 de agosto ás 23:00 horas.

● Chenoa cantará en Betanzos o sábado 24 de agosto ás 22:30 horas.