As obras nunha céntrica rúa da Coruña favorecen unha vaga de roubos

As obras nunha céntrica rúa da Coruña que está a ser peonalizada están a provocar unha vaga de roubos. É a rúa do Santo André, que leva co tráfico pechado desde o 3 de agosto. 

Os comerciantes aseguran que os delincuentes actúan con "total descaro e impunidade", xa que a Policía non pode patrullar pola rúa por mor das obras.

Así as cousas, viven amolados pola inseguridade e tamén pola presenza de toxicómanos. "É un ir e vir constante... e xa os ves aí pasándose cousas", conta Rosa, unha das comerciantes que sufriu roubos na súa panadaría.

Porén, os comercios non son as únicas vítimas. A construtora que leva a cabo estas obras, tamén o é. De aquí roubaron ferramentas e mesmo gasolina e o aceite da maquinaria.

Os comerciantes din que o que non pode ser é que leven case un mes sen policía na zona. Por este motivo, piden que, xa que non poden patrullar en coche, que o fagan a pé.