As oposicións de educación celebraranse a terceira fin de semana de xuño
As oposicións de educación celebraranse a terceira fin de semana de xuño
As probas realizaranse en 14 localidades de toda Galicia, cun total de 222 tribunais
Os interinos e substitutos non estarán obrigados a presentarse ao procedemento
A Xunta celebrará as oposicións de educación durante a terceira fin de semana de xuño en 14 localidades de toda Galicia, cun total de 222 tribunais.
Segundo informou o Goberno galego, as probas para os corpos de profesorado serán o sábado 18 de xuño, e para o resto (inspectores, profesores de secundaria, de escolas oficiais de idiomas e de artes plásticas e deseño), o domingo 19.
As localidades que acollerán os exames son:
-A Coruña, Culleredo, Ferrol, Narón e Santiago de Compostela.
-Lugo e Monforte de Lemos.
-Ourense e O Carballiño.
-Pontevedra, Marín, Lalín, Vigo e Vilagarcía de Arousa.
Os espazos concretos nos que se realizarán os exames publicaranse nos vindeiros días no Portal Educativo. Lembran que, ao amparo do acordado coas organizacións sindicais, os interinos e substitutos non estarán obrigados a presentarse ao procedemento.
En total, 22.919 persoas concorrerán ás oposicións nun proceso que se desenvolverá segundo o sistema habitual. Optan ás 2.484 prazas convocadas.
