As vendas de vehículos de ocasión en Galicia medraron un 13 % en xullo
As vendas de vehículos de ocasión en Galicia medraron un 13 % en xullo
Aumenta a demanda de coches seminovos e quilómetro cero, baixa a dos coches con maior idade
O prezo e a dispoñibilidade inmediata animan o mercado de segunda man
O crecemento das vendas dos coches de ocasión é continuado, pero o mes de xullo foi toda unha explosión cun aumento do 13 % en Galicia.
"Os coches novos subiron moito de prezo eu optaría por segunda man"; "Eu penso que os prezos están intratables, tanto dos vehículos novos como dos de ocasión"; "Eu merquei de ocasión porque estaba en moi boas condicións, poucos quilómetros e non o pensei dúas veces", din algúns condutores.
Non só o prezo move este mercado. Desde a pandemia os prazos de entrega dos coches novos dilatáronse e moitos clientes queren a entrega inmediata. Canto ao tipo de motor, preto da metade das vendas de ocasión son de diésel.
"Segue gañando o diésel, a gasolina está moi presente no crecemento e o híbrido tamén, a xente pregunta polas zonas de emisións baixas nas cidades", explica Alfredo Miguélez, vendedor de coches.
Ademais, retroceden as vendas dos vehículos de máis de dez anos e medra o interese polos vehículos con menor idade.
"Temos coches cun ano e 5.000 quilómetros, mesmo de cero quilómetros. Aí é onde competimos coa venda de coche novo, é un seminovo, pero practicamente un reestrea", engade o vendedor.
Malia o impulso do mercado de ocasión, o parque móbil segue a estar envellecido. Segundo a patronal Anfac, máis da metade dos coches en Galicia teñen máis de quince anos.
