As vilas mariñeiras celebran o Día do Carme por todo o alto
As vilas mariñeiras celebran o Día do Carme por todo o alto
Localidades como Camariñas, Foz ou Bueu festexan o día da patroa das xentes do mar con flores e procesións
A festa do Carme é a celebración mariñeira por excelencia en Galicia. É a patroa do mar e dos homes que viven del. Hoxe no día grande da Virxe, practicamente toda a comunidade honra a Virxe dun xeito ou outro, pero o mar segue a ser o lugar onde se lle fai o tributo máis grande.
Camariñas leva baixo a danza dos mozos da vila ata os barcos a patroa. Foz engalana as rúas con flores para que a Virxe do Carme chegue ata o porto pisándoas. Este 16 de xullo poucas vilas mariñeiras non honran a patroa do mar.
![Procesión en Foz](https://img-g24-crtvg.flumotion.com/prog24/2024/20240716/DIADOCARMECAMARINHASEFOZ_frame_4363.png)
A xente do mar de Camariñas festexa con paixón e devoción a súa patroa, a Virxe do Carme. Os nervios xa comezaban o día anterior, engalanando os barcos con bandeiras e cintas de cores.
Veciños e turistas chegados de todos os puntos do país desfrutan dos actos desta xornada. Despois da misa, e baixo o son das gaitas, os mozos da vila bailan a danza dos arcos.
Subida a Virxe ao barco, comeza a procesión marítima, na que a frota percorre a ría ata Muxía. A medio camiño faise a ofrenda floral polos mariñeiros falecidos. Lánzase unha coroa á auga e os barcos dan voltas ao redor.
A Estrela dos Mares ou a Gardiá dos Pescadores tamén recibiu esta mañá a devoción e o fervor dos mariñeiros de Foz e a Mariña lucense.
A devoción á Virxe do Carme tamén é enorme no Morrazo. En Bueu, as alfombras florais non son só patrimonio do Corpus e nesta vila levan esta tradición á contorna da lonxa.
![Alfombras florais en Bueu](https://img-g24-crtvg.flumotion.com/prog24/2024/20240716/colALFOMBRASFLORAISBUEUDIADOCARME_frame_1545.png)
A maioría dos motivos dos tapices están vinculados ao mundo mariñeiro, a tal punto que incluso usan cunchas nos deseños, recreando artisticamente o que podería ser unha sorte de procesión de flores en terra, en homenaxe á patroa do mar.