Atopan o cadáver dunha muller onde buscaban a condutora arrastrada pola riada en Toledo
Atopan o cadáver dunha muller onde buscaban a condutora arrastrada pola riada en Toledo
Sería a oitava vítima mortal da gota fría da fin de semana pasada
Cinco minutos de silencio en Alcorcón en lembranza do seu veciño Manuel López
Un total de 150 membros da Unidade Militar de Emerxencias sumáronse este sábado ao dispositivo para localizar a muller desaparecida o domingo pasado en Valmojado, na provincia de Toledo.
Conducía o seu coche por esta zona, unha das máis afectadas pola gota fría. O luns atoparon o vehículo baleiro e este mediodía o corpo da que, á espera de confirmación, sería a oitava vítima mortal da DANA.
"Un can da UME localiza a 50 metros do regato Vallehermoso o corpo sen vida dunha muller, pendente de identificar, que estaba agochado entre a maleza e a lama", informa Toñi Requena, voceira da comandancia da Garda Civil de Toledo.
En Aldea del Fresno, ao sur de Madrid, unha das zonas arrasadas pola DANA, a prioridade é restablecer a subministración de auga potable e as estradas. Tres dos catro accesos á localidade están cortados pola caída das pontes.
"Imos poñer unha plataforma peonil, a ver se podemos tela colocada a finais da semana que vén para dar acceso á xente aínda que sexa camiñando ao outro lado da ponte porque hai persoas que teñen que facer 96 quilómetros estando a 4 quilómetros do posto de traballo", asegura Alberto Plaza, rexedor da localidade.
"Removéronse 600 toneladas de terra en Aldea del Fresno para construír un espigón para soster a tubaxe que fornece de auga potable 270.000 veciños de Toledo", explica Francisco Martín, delegado do Goberno en Madrid.
Cinco minutos de silencio na localidade madrileña de Alcorcón para recordar o seu veciño, Manuel López, falecido na riada, e solidarizarse coa súa muller e os fillos.
